Tanba ne’e, kandidatu Prezidente Repúblika (PR) períodu 2022-2027 akompaña husi Koordenadora Fiar Iha Asaun Realidade (FIAR), Dulce de Jesus Soares, tersa (22/02) fó apoiu umanitária, ropa ho unidade hamutuk 140 no hand sanutizer 100 ba família boot Asosiasaun Halibur Difisiénsia Matan Timor-Leste (AHDMTL).
Ba totál ropa ho unidade 140 ne'e kompostu husi ropa feto nian hamutuk unidade 70 no mane 70 ne’ebé oferese ba ema ho defisiésia matan ne’ebé hamahan-an iha AHDMTL.
Sasán hirak ne'e, hetan apoiu husi Kompaña Sales Luis, Lda ba ekipa Fiar Iha Asaun Realidade (FIAR) ne'ebé mak distribui direta husi José Ramos Horta ba Diretór AHDMTL, Gaspar Soares, ne'ebé akompaña husi Koordenadór FIAR, Dulce de Jesus Soares inklui membru AHDMTL.
Hafoin entrega sasán hirak ne'e, José Ramos Horta agradese ba domin boot husi ekipa FIAR ne’ebé la kolen hodi kari sira-nia domin ba grupu no ema difisiénsia no labarik orfonatu no komunidade sira ne’ebé presiza ajuda iha tempu difísil sira.
“Agradese tebes bele hamutuk ho ekipa FIAR durante fulan kotuk to’o mai ohin kontinua halo asaun karidade hodi apoia ruma no aproveita halo enkontru hodi rona ita-nia alin no oan sira husi Asosiasaun Halibur Difisiénsia Matan Timor-Leste nia preokupasaun sira”, dehan Horta iha edifísiu AHDMTL, Manleuana, tersa (22/02).
Iha ne'e, Ramos Horta mós halo vizita direita hodi haree kondisaun uma ne’ebé família boot AHDMTL aluga husi komunidade sira hodi hela, tanba seiduak iha edifísiu propriu.
Durante vizita, Horta haruka kedas ekipa tékniku sira ba sosa materiál hanesan, kadeira meza, inklui sosa vintuña hodi apoia família AHDMTL bele utiliza hala’o sira-nia prosesu aprendizajen.
Diretór AHDMTL, Gaspar Soares mós, agradese ba vizita supreza husi Ramos Horta hodi rona preokupasaun difiénsia sira-nian ne’ebé liga liu ho sira-nia direitu atu asesu ba edukasaun, saúde no asesu ba fasilidade públiku sira ne’ebé presiza hetan konsiderasaun husi Governu.
Dadauk, ema ho difiénsia iha Timor-Leste hamutuk 38.118 kompostu husi difiénsia matan 14.828, difiénsia tilun ka labele rona no labele ko’alia hamutuk 12.511, difiénsia motora 7.466 no difisénsia pisiko sosiál ka moras mentál hamutuk 3.313.
Husi númeru ne’ebé mesiona maioria família difiensia barak hela iha área rurál, moris terus tebes labele asesu ba edukasaun no saúde, tanba moris vulneravel.
Hafoin introduz, Gaspar mós entrega kedas proposta ba Ramos Horta no Prezidente Paridu CNRT, Kay Rala Xanana Gusmão, bele ajuda sira buka doadór hodi halo kontrusaun ba edifísiu no uma eskola ba família boot AHDMTL iha rai privadu ne'ebé sira sosa ona iha Suku Tibar Munisípiu Likisá.
Reprezentante FIAR, Dulce de Jesus Martins hatete, apoiu ne’ebé sira oferese ne'e sei la haree ba nia valór, tanba sira ofereta ho domin hodi tulun família AHDMTL.
“Apoiu sira ne’e ita oferese tuir nesidade sira ne’ebé ita obserta katak, ita-nia família sira ne’e presiza hanesan ropa ba feto hamutuk unidade 70, ba mane 70 inklui apoiu mós hand santizer ne’ebé oferese hodi parseiru Kompaña Sales Luis Lda”, informa Dulce.
Dadaun ne’e, parte FIAR mós servisu hamutuk ho Embaixada Xina iha Timor-Leste hodi fahe mós muskitéiru ba komunidade iha Postu Administraitu Na’in Feto, Suku Bemori ne'ebé komunidade sira hetan apoiu moskiteiru no roupa balun, tanba área refere risku ba moras dengue. (*)