“Ohin reuniaun Konsellu Superior Defeza Seguransa (KSDS) no mós  Konsellu Estadu (KE) sira rekomenda ba Prezidente kona-ba pedidu governu nian atu hato'o ba Parlamentu Nasionál, depois Parlamentu Nasionál hodi diskute atu estende ou la estende estadu emerjénsia”, dehan Xefe Casa Sivil,  Maria Francisco Vasconselho hafoin surumutu ho Prezidente Repúblika iha palásiu prezidensiál Bairopite, segunda (26/07).

Tanba ne’e oras balun tan sei haruka ba Parlamentu Nasionál karta ne'ebé mak governu hato'o ba Prezidente Repúblika atu husu estensaun ba estadu emerjénsia.

Kona-ba médida sira hanesan uluk, maibé nasaun viziñu iha ona variante Delta komesa sa'e tanba ne'e mak atu prevene husu ba Parlamentu Nasionál atu diskute hodi deside atu estende estadu emerjénsia.

Iha fatin hanesan, Diretór Ezekutivu Forum Organizasaun Naun Governamentál Timor Leste (FONGTIL), Daniel Santos do Carmo hatete, sira-nia prezensa iha reuniaun Konsellu Estadu hanesan observadór kona-ba, estensaun estadu emerjénsia ba dala-16 entaun maiória husi konsellu sira hotu fó opiniuan katak apoiu proposta governu nian ba estensaun estadu emerjénsia.

“Hanesan observadór ita haree oinsá mak ita-nia ánaliza ba situasaun real ho proposta ne'ebé governu hatun mai iha nesesidade ba estensaun estadu emerjénsia, tanba ita agora iha prosesu antisipasaun ba variante Delta foun iha ita-nia rain ona”, dehan nia.

Maibé sei iha kontrollu governu nian iha kuarentena mak dezenvolve, entaun antesipa tanba iha esperiénsia Covid-19 ida ninia orijinál nia tama nasaun Timor-Leste la'ós ema sira paisajen legál ne'e lae maibé paisajen ilegál sira.

“Ho esperénsia ne'ebé iha ne'e, mak ita hanoin katak, estadu emerjénsia ne'e, saida mak proposta nian ne'e iha nesesidade atu halo estensaun, maibé entermu saida mak ohin ita hatete, mak ita tenke rigorozu tanba ita iha problema ida, governu reativa eskola depois proposta mai estensaun estadu emerjénsia”, dehan nia. (*)