"Ha’u deskonfia ona ita-boot (Olinda) envolve iha ró (Tranship II) ne'e karik, kuandu ha’u temi ona ró ne'e ita sempre alerjia, parese ita envolve ona”, dehan nia iha Plenáriu Parlamentu Nasionál (PN), tersa (6/7).

Tanba deputada Olinda Guteres iha segunda (05/07), deklara atu koa saláriu deputadu hodi bele sustenta kbi’it la’ek no inan faluk sira, maibé CNRT sita kazu Ró tranship II, deputada Olinda komesa foti kestaun hodi hatan hasoru.

Ho ida ne’e, CNRT haree governu fakar osan barak tanba utiliza rihun-US$220 ba aluga Ró, no rihun-US$30 ba konbustivel.

Haree ba osan rihun US$250, di’ak liu halo uma ba sidadaun sira ne’ebé mak agora dadaun tur halerik bazeia ba deklarasaun deputada olinda, tanba osan boot ne'e bele halo uma hamutuk 55 ba kbi'it la’ek kada fulan.

"Ho osan ida ne’ebé mak montante boot teb-tebes ne'e, nusa ida ne'e la haree mak sira ne’ebé dadauk araska hela, tur iha udan laran, tur iha loron laran, hán laiha, hemu laiha”, hatete nia.

Hatan ba kestaun ne'e Xefe Bankada KHUNTO, Olinda Guteres rejeita akuzasaun Deputadu CNRT nian tanba nia la'ós komete korrupsaun.

"Ha’u la'ós Emília Pires, ita-boot temi ha’u-nia naran envolve, ha’u hán saida iha ne'eba”, dehan nia.

Maske Ministru Transporte Komunikasaun (MTK)  KHUNTO nia ema, maibé la taka dalan ba deputadu CNRT kuandu iha kapasidade bele ba okupa kargu Ministru.

"Ita-boot matenek ba tur iha ne'eba, ita-boot ne'e inkapasidade ne'e mak la ba tur iha ne'eba ne'e, ema la hili ita-boot sai ministru”, dehan nia. (*)