Prezidente CNE, Alcino de Araújo Barris hatete, serimonia resensiamentu eleitorál no atualizasaun baze dadus ba eleisaun prezidensiál 2022 tanba tuir regra molok atu halo lansamentu ba oin tenke iha uluk publikasaun fulan ida antes.
“Ami aprova tiha ona iha fulan kotuk publikasaun, ohin halo lansamentu resensiamentu eleitorál no atualizasaun baze dadus”, informa Alcino de Araújo Barris, iha edifisiu CNE, Kolmera, kuarta (1/07).
Tanba resensiamentu eleitorál ne'e realiza iha tempu tomak esertu iha periodu loron 30 antes dkualquer aktu eleitorál no bele kontinua fali hafoin publikasaun rezultadu eleisaun.
Baze dadus ne'e rasik estabelese ho finalidade organiza no mantein permanente no atuál kona-ba informasaun relativa ho sidadaun ne'ebé leitór eskritu iha resensiamentu eleitorál
“Eleitór sira mak enskritu ona iha baze dadus mak iha direitu hodi ezerse sira-nia direitu votu iha eleisaun sira. Ne'e siknifika kredibilidade no verasidade husi dadus ne'e afeta ba kredibilidade rezultadu absoluta eleisaun ne'e rasik”, esplika nia.
Iha fatin hanesan Diretór Jerál STAE, Acilino Branco hatete, resenseamentu iha Munisípiu la'ó normál hela, maibé reforsa tan rekursu sira hanesan material ekipamentu nomós pesoál sira hafoin bele halo atendementu máximu liután iha Postu Pdministrativu,
Tanba ne'e lansamentu hahú semana oin iha nível Munisípiu nomós Postu Administrativu sira sei hala'o atendementu ba resensiamentu nomós atualizasaun baze dadus ba sidadaun sira bele ba rezistu atubele partisipa eleisaun prezidensiál iha tinan 2022.
“Prosesu ida ne'e sei la'ó to’o fulan ne'en ho balun no sei kobre territóriu tomak, ida konsentra iha nível postu administrativu, posibilidade sei halo atendimentu mobile hodi hakbesik atendementu ne'e ba komunidade ka eleitór sira ne'ebé mak hetan difikuldade transporte atu hakbesik-an ba sentru atendementu”, informa nia.
Entretantu Ministru Administrasaun Estatál (MAE), Miguel Perreira de Carvalho, apelu ba populasaun sira ho idade 17 ba leten no ba sira ne'ebé hakarak atualiza kartaun eleitorál bele hakbesik-an ba resensiamentu eleitorál.
Ba sidadaun sira ne'ebé iha rai liur, STAE CNE hamutuk ho Ministériu Negósiu Estranjeiru no Kooperasaun sei ba to’o iha unidade geografiku distritu konsular sira resensiamentu nia pelumenus lima iha estranjeiru.
“Para que bele halo resensiamentu eleitorál ba sidadaun eleitorál foun sira nomós halo atualizasaun baze dadus, ida ne'e sei halo iha periodu de Agusto no Setembru nia laran no prioridade mak iha Inglaterra, Irlándia, Korea Súl, Austrália nomós Portugál”, informa nia. (*)