Pakote lei eleitorál tolu ne’e hanesan lei órgaun administrasaun eleitorál, Lei resensiamentu eleitorál, no lei eleitorál Prezidente Repúblika.

Prezidente PN, Deputadu Aniceto Longuinhos Guterres Lopes hatete, pakote lei hirak ne'e, dadauk Komisaun A trata asuntu justisa no konstituisional aprezenta ona relatóriu pareser ba meza atu deputadu s sira debate iha jeneralidade.

“Pakote lei eleitorál tolu ne’e ajenda ba segunda (21/6), kona-ba diskusaun no aprovasaun iha jeneralidade”, informa Aniceto iha PN, sesta (18/06).

Husi pakote lei tolu ne'e, bainhira Komisaun A no plenária aselera diskusaun, mak Parlamentu espera antes fulan-juñu remata bele aprova iha finál global, nune’e haruka ba Prezidente Repúblika atu hetan promulgasaun.

Tanba, pakote lei eleitorál tolu ne’e prioridade atu aposta ba debate ho karáter urjénsia.

Aleinde prioridade tuir mai mak lei enkuardamentu orsamentu no jestaun finanseira públika, mós Parlamentu Nasionál agora ne'e buka atu trata hotu, atu nune'e molok tama loron 14 fulan-jullu, tenke aprova hotu finál globál nune’e haruka ba Prezidente Repúblika.

Enkuantu proposta alterasaun ne'ebe governu liuhosi Ministériu Administrasaun Estatál (MAE) aprezenta mak hanesan alterasaun datoluk ba lei númeru 5/2006, 28 dezembru, kona-ba órgaun administrasaun eleitorál, alterasaun dahuluk ba lei númeru 6/2016, 25 maiu, kona-ba lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika. (*)