Tuir eis vise Ministru Negósiu Estranjeiru no Kooperasaun (MNEK) Contancio Pinto katak, TL hein de'it desizaun saida mak tribunal Indonesia foti ba kazal nain rua ne'e.

"Ita husik lai, ne'e juatisa mak la'o, mas la'o tranparansia. Haree ba kazu sira nain rua nian ne'e oinsa, sira nain rua mak autór ba tráfiku droga ne'e ka. Tanba ne'e mak ita hein katak Indonesia bele halo invstigasaun ho di'ak", dehan eis vise MNEK Constancio Pinto iha palásiu governu, Segunda (15/07/2019).

Nia afirma, Kazu kazal rua ne'e, Indonesia bele halo investigasaun kle'an para bele hola desizaun justu ba kazal nain ruan ne'e.

"Klaru katak TL nia kbiit mak halo negosiasaun ho Indonesia para iha garantia ba prosesu transparansia. Ita hatene katak iha ita nia nasaun ita kaer mós sidadaun Indonesia balun ne'ebé tuir lei tama ona iha kadeia", tenik nia

TL hein katak Indonesia la fó pena morte ba Sidadaun TL, entaun TL husu para Indonesia haree situasaun ne'e ho didi’ak

"Ita hein katak Indonesia labele fó tragon, narkotráfiku ka pena morte, mas ita husu para Indonesia haree didiak kestaun ne'e. Tanba dalaruma, sira nain rua inkonsientemente lori sasan ne'ebé mak sira labele lori," tenik Constancio

Entretantu, Inocencio Xavier husi Asia Justice and Right (AJAR) katak, kazal timor oan nain rua iha Indonesia atu livre depende ba faktu kazu nian.

"Depende ba faktu ne'ebé iha, tanba ne’e kazu fragantu delitu, no lori ita ba konsultaun, no agora ne'e nafatin iha prejunsaun inosensia. Entaun maske faktu hanesan ne'e, maibé orsida iha proseau nia laran kompeténsia iha judisial," dehan Inocensio

Nia dehan kazu kazal nain rua ne'e akontese iha teritóriu nasional RI nian, entaun lein Indonesia mak sei funsiona.

"Kriminal ne'e akontese iha teritóriu nasional Indonesia nia entaun sei uma ema nia lei nasional liu-liu kona-ba kitab undan-undang pidana, entaun sira sei uza ida ne'e hodi akuza," nia esplika.

Nia dehan, familia kazal nain rua ne'e mós la lakon esperansa no konsege hetan ona advogadu legal ida hodi bele akompaña sira iha posesu justisa nian.

"Posibilidade bele livre ka lae ne'e horsida faktu mak sei hatudu, defeza mak sei hatudu ninia kualidade defeza katak ita nia sidadaun bele hetan pena karik, la'os pena de morte," nia komenta

Nia afirma, lei Indonesia nian, bainhira ema ruma partisipa iha tráfika ka krime droga nian penalidade mak mate.

"Ita boot sira hatene katak lei Indonesia kuandu prátika trafiku droga ka krime droga, ninia penalidade mak mate ka pena perpetua. Nune'e ita hein katak pena rua ne'e labele kona sira nain rua, karik pena suspensaun ka pena detensaun ne'ebé labele fó impátu ba sira nain rua nia vida produtivu ne'e", tuir Inocencio

Nia mós husu ba governu liu-liu MNEK ho nia kunsuladu sira iha Indonesia nomór ministrériu justisa atu apoiu nafatin ba servisu ida ne'e, liu-liu familia sira apoiu informasaun ba adovogadu atu bele halo defeza diak ba sidadaun timoroan nain rua ne'e.