Vise Prezidente Parlamentu Nasionál, deputada Maria Angelina Sarmento hatete, kona-bá debate ne'e Parlamentu nasional preve ona ba ajenda plenária loron segunda (07/06).

Tanba durante ne'e Timor-Lestd halo estensaun Estadu Emerjénsia, laiha biban ba deputadu sira atu halo debate abertamente ho governu, tanba diskusaun ne'e limitadu.

"Entaun Prezidente PN foti inisitiva ida hakarak iha fali debate ida atu ko’alia klean kona-ba implementasaun ba kombate covid-19 inklui ita-nia prosesu vasinasaun ne'e to'o iha ne'ebe ona”, dehan nia iha PN, segunda (07/06).

Maibé, plenária la konsege realiza tanba deputadu sira liliu meza PN, hakat fó sentidu ba deputada Lidia Martins ninia inan ne’ebé hakotu iis iha loron 06 fulan-juñu tinan 2021, nune'e meza ba akompaña hela misa iha igreja katedral ho deputadu sira balun la dun informadu atu prinse korum.

Tanba ne'e plenariu dadersan nian sei realiza iha plenariu lokraik tuku 15:00 otl, maibe ida sei iha de'it aprezentasaun fiskalizasaun komisaun E nian, depois tuir mai sei halo debate ida ho governu kona-ba estratejia ba imitigasaun covid-19.

Objetivu prinsipal debate ho governu atubele haree programa vasinasaun ba sidadaun ne'e pursentajen hirak mak vasina ona, nomós númeru pozitivu ne’ebé aumenta bebeik.

"Tanba inklui semana oin atu iha tan vasinasaun ba segundu doze ninian, ne’ebé ida ne'e mak objetivu ida hakarak rona husi governu ninian”, hatete nia.

Enkuantu Ministru Asuntu Parlamentar no Komunikasaun Sosiál (MAPKOMS), Francisco Martins Jerónimo rekoiñese, Parlamentu Nasional iha duni ajenda ida atu halo debate ho governu kona-ba asuntu estratéjia prevensaun covid-19.

"Sim atu debate ko’alia kona-bá politika prevensaun ba covid ninian ou vasina ninian, mais ne'e labele realiza tanba ajenda Parlamentu ninian muda fali. Ohin loraik sira iha de'it ajdena (antes de orden do dia) de'it, entaun diskusaun ne'e mak iha maibé debate (orden do dia) nian ne'e laiha”, hatete nia ba www.tempotimor.com iha PN, segunda (07/06). (*)