Tempotimor (Dili) - Parlamentu Nasional (PN) simu proposta lei 4. Proposta 4 kona-ba alterasaun lei no ida seluk lei ratifikasaun Fronteira Maritima.

Prezidente Parlamentu Nasional, Arão Noé de Jesus Amaral hateten, PN simu ona proposta lei lima husi governu kona-ba soberanu Timor Leste nian iha tasi laran. 

"Proposta lei haat ba alterasaun lei sira ne'e, depois lei ida seluk kona-ba tratadu ratifikasaun fronteira marítima", dehan nia, iha Parlamentu Nasional, Tersa (9/7). 

Proposta lei sira ne'ebé simu ona ne'e sei despaixa ba displan hodi halo preparasaun pareser tekniku para hodi haree ba prienxe kritéria legalidade depois ajenda ba reuniaun iha lider bankada. 

"Iha reuniaun lider bankada depois bele baixa para semana oin sira hanesan ne'e (diskute)", dehan Arão. 

Tuir previzaun Parlamentu Nasionál nian diskusaun lei sira bele termina iha fim-de-Jullu, maibe depende mos ba sekuensia debate iha plenaria, tanba haree ba asusntu ida-idak ho detallu. 

Lei ne'ebé Prezidente PN simu husi Governu mak alterasaun Lei Tributária, alterasaun Lei Atividade Petrolifeiras no alterasaun Lei Fundu Petrolifeira nian, lei rua seluk mak lei nu. 3/2003 no lei nu. 4/2003.