"Ha'u respeita, mas ha'u hatete, di'ak liu ita rona autóridade saúde, rona Organizasaun Mundiál Saúde”, afirma Horta hafoin enkontru ho Primeiru Ministru, Taur Matan Ruak iha rezidénsia Farol, tersa (27/04).
Nune'e, kona-ba vasina AstraZencas, hothotu rona mak autóridade saúde, no labele rona deputadu sira ko’alia fali iha PN, tanba autoridade saúde rasik bele haree problema saúde nian.
"Ha'u hakarak rona kona-ba problema saúde, ha'u la ba rona fali deputadu ida ko'alia, ha'u rona mak Ministériu Saúde, ha'u rona mak OMS ka UNICEF ko'alia", dehan Horta.
Maske, Deputadu balun iha Parlamentu Nasionál rezeita vasina AstraZencas ne'e, hanesan opiniaun ne’ebé respeita, maibé rona mak autoridade sira husi saúde.
"Ha'u hatete nune'e, ha'u respeita matenek boot sira iha Parlamentu, ha'u rona balun foin dadauk ko'alia kontra vasina (AstraZencas) ne'e, ha'u respeita, tanba sira parese ké ema estudu boot lós iha siénsia, sientista liu fali OMS, liu fali sientista atus ba atus ne'ebé servísu iha Mundiál Saúde iha zenebra ne'eba”, dehan Horta.
Eis Prezidente Repúblika ne’e, halo komparasaun, bainhira hakarak ko'alia estrada, fiar mak enjeñeiru, no Ministériu Obrás Públiku, la'ós fiar fali Ministériu Negósiu Estranjeiru no Kooperasaun.
"Sé ha'u hakarak haree estrada ida metin ka la metin, ha'u ko'alia ho enjeñeiru sira ho Ministériu Obrás Públiku, ha'u la ba ko'alia ho Ministériu Saúde, ha'u la ba ko'alia ho Negósiu Estranjeiru para haree estrada ne'e di'ak, uma ne'e metin ou lae”, kompara nia. (*)