Hanesan públiku hatene, mandatu Prezidente Autoridade Rejiaun Autonomu Espesial Oekusse-Ambeno (RAEOA) ne’ebé kaer husi Mari Alkatiri sei remata iha fulan ida ne’e nia rohan.
Liu husi Konferensia AMP, membru partidu CNRT, PLP, no KHUNTO ne’ebé hala’o durante loron rua nia laran, hahú husi Sabadu (15/06) to’o Domingu (16/06) ho tema “Konsolida AMP hodi Serbi Di’ak liu tan Povu” diskuti mós asuntu refere.
Iha loron ikus konferensia, AMP hasai rezolusaun balun no pontu importante balun iha rezolusaun ne’e kona-ba la extende mandatu atual Prezidente Autoridade RAEOA, Mari Alkatiri.
Iha rezolusaun ne’e, AMP rekomenda ba Primeiru Ministru Taur Matan Ruak atu indika ema seluk hodi troka Alkatiri nu’udar Prezidente Autoridade RAEOA.
Aleinde pontu ne’e, pontu importante seluk ne’ebé fó sai iha rezolusaun AMP mak projetu 143 ne’ebé to’o ohin loron sei sai problema.
Ba asuntu remodelasaun, iha rezolusaun ne’e fó kompetensia ba Konsellu Ministru atu tenke halo avaliasaun periodika ba membru governu sira no ba sira ne’ebé laiha dezempeñu di’ak konsidera atu remodela.