Maske, governu husu pedidu ho karater urjensia ba proposta retifikativu ne'e, maibé difísil ba deputadu sira atu halo debate tanba iha dokumentu balun Komisaun C foin simu iha loron segunda (19/04).

Ne'e duni, governu presiza klarifika tan alterasaun orsamentu husi ne’ebé, no ba saída, nune'e bainhira deputadu sira halo proposta karik labele hela ho konfuzaun.

"Ami-nia prezidente Komisaun C iha audensia mós hato'o, governu tenke fó númeru, muda husi ne’ebé, tanba ami la hatene, relatóriu la mai ne'e”, afirma nia iha parlamentu nasionál (PN), tersa (20/04).

Ba kestaun ne’e, Primeiru Ministru (PM), Taur Matan Ruak hatete, nia parte louva no agradese parte hotu ne’ebé fó ona apoiu favoravel hodi aprezenta opsaun ajuda governu buka solusaun ba problema inundasaun inklui dezastre natural.

Maibé parte governu mós sei mai aprofunda ka (Haklean), nune'e molok deputadu sira fó votu karik bele fasilita deputadu hatene di’ak liután kestaun proposta retifikativu ne'e

“Ha’u hanoin iha espesialidade ami sei aprofunda liután, naturalmente distintu/a deputadu sira para fó nia votu naturalmente presiza hatene ida klean liután”, afirma PM Taur.

Ho situasaun dimensaun ka destribuisaun iha Dili, klaru katak situasaun ne’ebé ema hotu haree, no governu rasik la konsege tau orsamentu, tanba dezastre ne'e mosu, governu submete ona orsamentu ba PN.

"Klaru ita hotu moris iha Díli, ita hotu la'o, haree loroloron liuhusi televizaun ou haree ho matan, dimensaun de distruisaun ida ne'e”, hatete nia.

Maibé, momentu ida ne’e atu hamosu asaun, no posivel, presiza iha hakbiit ida husi governu no PN, para fó resposta ba situasaun ida ne'e.

"Ha’u hanoin ne'e di’ak liu, ba ita hotu, liuliu ba nasaun”, haktenik nia.(*)