Deputadu sira-ina saláriu 50% ne’e hodi reforsa nesesidade estudante universitáriu sira ne'ebe hela kost iha kapital nasaun durante implementasaun serka sanitária no konfinamentu domisiliáriu obrigatóriu.

Tanba ne’e, hanesan maneira ida atu rezolve preokupasaun estudante sira-nian la'os de'it mai husi governu, maibé Parlamentu Nasionál mós bele iha planu ba ida ne'e.

Ba ida ne'e, Bankada KHUNTO porntu kontribui wainhira deside ona planu koa saláriu kada 50% husi deputadu.

"Se bele, ita labele ko’alia de'it governu, maibé ita deputadu 65 ne'e, ita iha sentimentu boot ida ba ita-nia oan sira husi Munisípiu 13, pelu menus koa 50% husi ita-nia saláriu , para fó apoiu," afirma Olinda iha plenária PN, segunda (22/03).

Bankada KHUNTO firme atu fó apoiu, tanba estudante hanesan timoroan, no deputadu sira tenke iha sentimentu umanu hodi apoia no labele hein governu.

Nune’e, Deputadu Luis Roberto hatete, nia parte fó apresiasaun ba planu governu, ne’ebé mak planeia atu fó ajudu ba estudante sira ne’ebé enfrenta hela hamlaha, durante serka sanitária.

Maibé husu nafatin ba governu atubele la'o hodi identifika didi’ak estudante husi universitáriu, sekundáriu inklui pre-sekundáriu sira, atubele justifika lolos.

Aliense ne’e, Deputadu bankada Partidu Demokratiku (PD), Mariano ‘Assanami’ Sabino, husu governu atu fó apoiu ba estudante sira karik labele liuhusi dadus sira ne’ebé xefe aldeia fó, maibé di’ak liu husu de'it Univesidade, inklui asosiasaun estudante munisipal sira.

Ladun aseita atu governu organiza estudante fila ba idaidak nia Munisípiu, tanba sira ba ne'eba mós sira enfrenta nafatin problema, entaun di’ak liu sira mantein, estuda, aprende iha fatin, nune'e apoiu, nomós governu apoiu hahán nomós ba fasilidade ne’ebé mak sira presiza liu.(*)