Tanba, hatur ona baze legál ba suspensaun atividade eskola sira iha pedidu aprovasaun estadu emerjensia ba dala-11, maibé bainhira mosu kazu Covid-19 grave ruma mak bele aplika.
Ho intensaun hatur referensia suspende atividade eskola iha medidas preventiva, tanba bainhira kazu grave ruma mosu karik, lá presiza atu halo tan interpretasaun ba legálidade.
Ministru Prezidensiá Konsellu Ministru, Fidélis Leite Magalhães informa, pedidu aprovasaun ne'ebé mak Prezidente Repúblika haruka mai ne'é demodu jerál kona-bá suspensaun direitu sira.
"Mais iha ne'ebá mós hatur liu aumenta tan parte ida involvimentu forsa armada nian iha medidas preventiva sira iha patroalla konjunta sira iha área hirak ne'ebé tama iha serka sánitaria, no mós iha ne'ebá aumenta tan referensia klaru kona-bá possibilidade atu bele halo suspensaun ba direitu edukasaun, nune'e sé bainhira situasaun pior iha fatin balun karik, laiha ona komplikasaun no interpretasaun legál kona-bá wainhira mak suspende eskola sira",dehan Nia hafoin partisipa plenaria estensaun estadu emerjensia dala-11 iha Parlamentu Nasionál, Segunda (01/03/2021).
Tanba, ida ne'e ita bele dehan karik, nia objetivu prinsipál la'ós atu aumenta liu-tan kompetensia legál sira, maibé atu halo klaru liu-tan baze legál hirak ne'ebé governu halo.
Nune'e mós pedidu husi Prezidente Repúblika ne'ebé haruka ba Parlamentu Nasionál kona-bá renovasaun EE dala-11 ofesiálmente sei suspende atividade hotu.
"Renovasaun EE ba Da-XI ne’ebé atualmente ein-vigór ho fundamental ba situasaun kalamidade públika ba periodu loron 30, ne’ebé hahú husi oras 00:00 kinta-feira (4/3) to’o oras 23:59 Sesta-feira (2/4), sei aplika ba teritóriu nasionál, entaun ofesiálmente sei suspende atividade hotu," dehan iha pedidu PR ba PN, Segunda (01/03/21). (*)