Nia dehan, Administrador Munisipiu Lautem sei simu pose iha loron segunda feira (11/01), Prezidente Autoridade Munisipal Munisipiu Baukau loron tersa feira (12/01), no Administrador Munisipiu Vikeke sei simu pose iha loron kinta feira (13/01).

"Ohin ami hasoru Primeiru Ministru informa kona-ba planu ministeriu ka planu governu nian ne’ebé mak iha semana oin fó pose ba administradór Lautem iha Segunda feira, no mós atu fó pose ba Prezidente Autoridade foun Baucau nian Tersa feira, no pose ba administradór Vikeke iha Kinta feira", MAE hato’o lia hirak ne’e ba jornalista sira hafoin sorumutu ho Primeiru Ministru, Taur Matan Ruak iha palasiu Governu, Sesta (08/01).

Nia akresenta, MAE simu mós instrusaun no orientasaun husi Primeiru Ministru Taur Matan Ruak kona-ba implementasaun planu sira iha Ministériu Administrasaun Estatál nian.

"Ohin ha’u mai hasoru Primeiru Ministru atu simu instrusaun nomós orientasaun servisu nian relasionadu ho implementasaun planu no mós orsamentu ba iha administrasaun lokál estadu sira ba iha munisipiu, postu no mos suku sira", nia dehan.

Governante ne’e hatutan, espesifiku liu foku ba implementasaun programa orsamentu ne’ebé mak aloka ba postu-administrativu sira, orsamentu hodi halo atividade sira iha postu-administrativu nomos iha nivel munisipiu.

Nune'e mos informa ba Primeiru Ministru kona-ba servisu perparativu sira seluk iha ambitu eleitotal nian iha Sekretariadu Tekniku Administrasaun Eleitotal ne’ebé mak iha tempu agora halo revizaun ba enkudramentu legal relasionadu ho preparativus ba eleisaun sira tantu prezidensial ho parlamentar nomos planu governu nian haree atu halo atualizasaun baze de dadus elitor sira.

Entertantu, sira ne’ebé atu simu pose iha semana oin mak, Olivio Freitas nu'udár Prezidente Autoridade Munisipal Baukau, Domingos Savio nu'udár Administrador Munisipiu Lautem, no Januario Soares nu'udár Administrador Munisipiu Vikeke. (*)