Ministru Salvadór Pires hateten, estrada nasionál ligasaun Baukau no Lautem, Baukau no Vikeke persentajen komesa sa’e ona.

“Estrada iha teritóriu Timor-Leste tomak hamutuk rihun 6 resin, ne’ebé estrada nasionál ligasaun Baukau Lautem ne’e atinje ona 79%. Estrada ligasaun Baukau Vikeke atinje ona 17%,” Ministru hateten iha Baukau, Kinta (17/12).

Nia akresenta, estrada ba postu administrativu sira ne’ebé pertense ba munsípiu Baukau kuaze lubuk ida mak tama ona iha planu.

“Estrada ligasaun Laga-Baguia, ponte Samalari, Laisorulai, Waikala tama ona iha planu, ne’ebé ita bele implenta tanba ita-nia estudu ne’e sei finaliza iha inísiu 2021,” nia dehan.

Ministru ne’e mós salienta, daudaun ne’e governu liuhusi MOP tau ona osan ba estrada hotu hamutuk millaun $105.

“Osan montante tomak ba estrada hotu ne’e millaun $105 ba fundu infraestrutura ba estrada, ne’e la’ós estrada munisipal de’it maibé projetu ongoing, estrada urbanu no seluk tan ne’ebé sei halo,” nia hateten.

Governante ne’e akresenta, estrada rurais ne’e halo reabilitasaun periódika, hanesan ligasaun Venilale no Waioli mós tama hotu ona iha planu, ne’ebé total kilometru 150 iha munisípiu Baukau.

Nia mós apela ba públiku katak, estrada ruál ne’ebé daudaun halo reabilitasaun ne’e projetu la’ós ILO nian, maibé ne’e governu Timor-Leste mak tau osan atu halo reabilitasaun. Ne’ebé ILO ne’e hetan fali servisu husi parseiru dezenvolvimentu TL nian hanesan Australia atu halo kapasitasaun ba traballdór no ministériu rasik.(*)