Nia hatutan, Parlamentu Nasionál mós le hotu ona dokumentu hirak ne'e, mosu duni korreksaun oitoan maibé, ida ne'e normál tanba proposta OJE ida agora mai ho orsamentu kada programa.

"Sim, errata ne’e normal tanba tinan-tinan mós governu hatama orsamentu mai sempre iha erata, no iha tinan ne'e, erata iha duni, barak oitoan tanba orsamentu 2021, orsamentu lahanesan babain, maibe ne'e orsamentu por programa," deputada Angelica hateten iha Parlamentu Nasionál, Sesta (27/11).

Nia esplika, liafuan erata signifika katak, iha korreksaun ruma ne’ebé governu presiza hadi’a, hodi bele haruka fila-fali mai Parlamentu, iha mós erata livru ruma ne'ebé bele mós fasilita deputadu sira hodi analiza fila-fali ba proposta ne'e.

Maski nune’e, nia afirma, iha faze ida inisiu husi orsamentu programa iha tinan 2021, governu mós halo erata, governu bele halo tanba ida ne'e lei, se karik númeru balun iha proposta ne'e sala, ou orsamentu balun iha por programa, ne'e mak sala iha alokasaun hanesan fali iha tinan uluk, entaun governu mós bele hadi’a no haruka daudaun erata ne'e mai PN.

Aleinde erata, nia afirma, Parlamentu liu husi lideres bankada aprova ona giaun ba debate orsamentu jeral estadu (OJE) 2021, no kalendáriu sei hahú debate iha dia 30 novembru.

Tuir rejimentu Parlamentu Nasionál hateten klaru ona katak, debate OJE, iha faze jeneralidade nian sei hala'o durante loron 3 no ba espesialidade ho finál globál ne'e loron 7. (*)