Xefe suku ne’e husu tanba, suku Vatu-Vou kompostu husi aldeia sanulu mak hanesan, Sanaro, Lisa Ara, Lisa Ico, Lebukailete, Vatunau, Bouraevei, Gariana, Maubu, Manuquebia ho Raime, no iha aldeia neen mak nia komunidade sira kuaze kilometru sanulu-resin-lima (15) hela ho distánsia dook husi sidade, liu-liu dook husi sede suku rasik.

“Iha aldeia 6 ne'ebé maka iha área rurais, ne’e ami husu atu sé bele kompañia ho vise prezidente komisaun sira bele lori to'o iha foho atu bele fahe ba sira ne’e besik liu. Sé fahe iha ne'e kedas, entaun sasan sira ne'e mesak todan de'it, sira hulan fali to'o iha foho nee dook”, Xefi Suku hateten ba jornalista iha nia kna'ar fatin, Segunda (23/11).

Tuir nia, bainhira SEKoop ho kompañia la transporta sasán ba to'o iha komunidade sira hela fatin, konserteza komunidade sei dezearaska aluga ema nia kareta hodi tula fila-fali ba iha sira nia hela fatin.

“Iha aldeia neen mak nia distánsia ne'e 15 km husi suku ba to'o sira nia fatin, ne'e maka presiza lori ba distribui ba iha sira nia fatin atu nune'e besik ba komunidade sira”, tenik nia.

Hatán ba kesataun ne'e, Sekretáriu Estadu Kooperativa (SEKoop), Elizário Ferreira hateten, bainhira SEKoop hala'o akordu ho kompañia sira deside ona katak, populasaun ne'ebé hela iha área remotas ka dook husi villa, kompañia tenke transporta duni produtu ba to'o iha komunidade sira nia fatin.

“Desizaun ida katak, sira tenke transporta duni ba área ne'ebé maka populasaun sira besik ba. Signifika katak fatin ne'e sira tenke asesu duni. Ita labele, tan de'it osan $50 nian halo povu kolen tiha, nia mai leba husi ne'e ba to'o fali foho mós nia seidauk han fós, nia mak dollar uluk tiha ona”, dehan nia.

Maske nune'e, nia husu ba komunidade tenke konsentra iha sede aldeia ka suku sira atu nune'e bele distribui dala-ida, tanba ekipa sei la entrega direta kada uma-kain.

Iha Suku Vatu-Vou, total xefe família hamutuk 1058 resin no populasaun hamutuk ema nain 5.556, kompostu husi, mane 2772 no feto 2784.(*)