Vise Primeiru Ministru ko’alia asuntu ne’e hafoin Deputadu Bankada CNRT Arão Noé husu vizaun governu nian kona-ba destinu projetu tasi mane no auto Estrada hodi garante dada kadoras mai Timor-Leste.

José Reis esplika ba Deputadu Arão katak, to’o oras ne’e nia seidauk haree estudu viabilidade bele lori duni pipeline mai Timor-Leste ka lae tanba akordu ne’ebé asina ho Austrália defied 70-30 dada mai Timor-Leste no 80-20 kadoras dada ba Austrália.

José Reis halo interpretasaun katak, Timor-Leste seidauk hatene loloos pipeline ka kadoras ne’e mai ka la mai.

“Sé ita hakarak halo duni auto Estrada ne’e atu responde ba pipeline mai, primeiru ita tenke hatene pipeline ne’e mai Timor-Leste ka lae, atu ita fó prioridade ba ida-ne’e, ita hodi halo auto Estrada ne’e. Sé ita mós sei dúvida hela ne’e komplikadu boot ba ita atu define, la’e aban bainhira ita halo tiha, pipeline la mai, sala sé-nian? tanba ita atu halo auto Estrada ida presiza iha retornu,” José Reis ko’alia iha Parlamentu Nasionál, ohin.

Maske pipeline sei inserteza hela, maibé governante ne’e hatene líder timor nian hakarak pipeline mai iha Timor-Leste dezde akordu ne’ebé asina iha 2005 katak, sé Bayu Undan dada ona ba Austrália entaun Greater Sunrise tenke mai Timor-Leste.

Nia dehan, ida-ne’e mai reforsa liután irmaun Xanana Gusmão ne’ebé durante luta hodi lori pipeline mai Timor-Leste.

“Maibé presiza estudu viabilidade ida katak, mai ka la mai tanba ne’e mak ha’u deskuti ona ho Primeiru Ministru atu haree oinsá mak atu-bele halo rezolusaun ida, nune’e halo estudu viabilidade ida, sé mai duni saida de’it mak prevee ona iha projetu Tasi Mane ita la’o bá-oin, se lae ita hotu-hotu iha hela situasaun dúvida,” Vise Primeiru Ministru sujere.

Bele Hare mos Video ne'e : https://www.youtube.com/watch?v=ejThsvlbW2k

Antes ne'e, Dr. Manuel Tilman mos dehan ona, problema bo'ot wainhira dada kadoras Greater Sunrise mai kosta sul no nia sujere atu pipa ne'e dada ba Australia nune'e Timor Leste hetan 80% hodi investe ba agrikultura duke dada mai tasi mane, Timor Leste hetan de'it 70%. (*)

PUBLISIDADE