Nia dehan, durante tinan barak nia laran ona povu TL sempre sofre husi konsekuénsia no inserteza polítika ne'ebé kria husi grupu irresponsabilidade hodi kontinua halo situasaun impasse polítika sai naruk.
"Ita hare katak, Mari Alkatiri provoka situasaun no agora mós nia rasik admite katak, korta dalan atu kaer ukun. Ne'e ita dehan katak, hamlaha ba ukun, sein iha responsábilidade ba saida mak ohin loron povu ne'e hasoru iha rai laran", Ángela Freitas hateten liuhosi Konferénsia Imprénsa ne'ebé hala'o iha sede Akait, Kuarta (11/11) .
Nia hatutan, situasaun ohin loron númeru dezempregu aumenta ba bebeik, no kompañia barak mak taka, inklui la fó konfiansa ba kompañia internasionál sira atu kuda sira nia investimentu iha rai laran, tanba de'it ema ida ninia hakarak.
"Tanba ne'e, husu mós favór ida ba Mari Alkatiri halo reflesaun atu para ho provoka situasaun ne'e, tanba ita hare katak, durante polítika rai laran, kríze dala-hira mak mosu iha rai laran, hatudu liman ba ema seluk, maibé ita rasik la toma responsabilidade", Ángela dehan.
Ángela esplika, TL prezisa hakmatek, presiza líder ne'ebé iha misaun ho vizaun di'ak atu lori nasaun ba oin, presiza ema hotu nia responsabilidade, presiza atu kaer metin lider karizmátiku sira, atu komprova ba mundu internasionál katak TL iha líder ida ne'ebé fó mahon ba nia povu tomak.
"Ita labele mai aprezenta aan dehan ita mak fundadór RDTL, funda ida ne'e, funda ida ne'ebá, maibé ita rasik mak sobu, ita rasik mak fura konstituisaun", nia lamenta.
Tempotimor.com koko ona atu konfirmasaun ho parte Dr. Mari Alkatiri maibe to'o notisia ne'e publika infelizmente lakonsege.
PUBLISIDADE