Tempotimor (Dili) - Mudansa ne'ebé halo daudaun iha instituisaun Radio Televizaun Timor-Leste (RTTL) nu'udar meiu ida atu halo transformasaun ba ne'e sai independente.
Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo hateten, substituisaun husi administrasaun to'o redasaun halo hodi mellora liután servisu iha instituisaun ne'e.
"Ita hotu tenke hakruuk ba ragra, hakru'uk ba lei no ita tenke simu ninia sansaun ka simu nia resultadu," dehan nia, iha Palásiu Governu, Kinta (30/07).
Tan ne'e, Ministru Asuntu Parlamentár no Komunikasaun Sosiál hato'o parabéns ba João da Silva ne'ebé nomeia atu asume funsaun hanesan vogál iha RTTL.
"Ho vogal sira ne'ebé oras ne'e iha RTTL.EP ita boot sira bele dezenvolve RTTL sai estatál ida ne'ebé tenke iha oin atu nune'e sira seluk bele la'o tuir," tenik nia.
Governu sei dezenvolve RTTL ne'ebé independente RTTL ne'ebé servisu fó informasaun ne'ebé kredivelidade, kualidade no edukasaun hodi hanorin povu saida mak demokrasia, dezenvolvimentu no saida mak loos.
Entretantu, João da Silva, nu'udar vogál konsellu administrasaun iha RTTL.EP hateten, koko atu servisu hamutuk ho vogal sira seluk atu halo servisu funsionamentu RTTL di'ak liu tan.
Nia dehan, ne'e hanesan oportunidade ne'ebé asumi atu servisu hamtuk ho kolega vogal sira seluk atu atu apoia dezenvolvimentu RTTL.EP hanesan televizaun estadu nian atu bele fornese informasaun sai naroman ba povu Timor-Leste tomak nune'e sai hanesan mata-dalan ba país ida ne'e.
Alende ne'e, Prezidente RTTL, Fransisco Gari hateten, Joao simu pose hodi kompleta membru vogál sira iha televizaun RTTL nian.
"Ami espera katak nia prezensa bele apoiu di'ak liu idea, para oinsá bele dezenvolve RTTL ba oin no halo funsionamentu serve sidadaun territóriu iha Timor-Leste". (*)