Tuir mai Tempo Timor publika kompletu konteudu Pedidu Retifikasaun ba Notísia husi Dr. Jose Ramos Horta hanesan iha karaik ne'e:
De: J. Ramos-Horta
Ba: Exmo. Senhor José António Belo, Diretor
Jornal Tempo Timor
Asuntu: Pedidu Retifikasaun ba Notísia
Kópia: Exmo. Senhor Virgílio da Silva Guterres, Prezidente Conselho de Imprensa
24 de Julho de 2020
Senhor Diretor,
Jornal on-line Tempo Timor publika, iha loron 23 de Julho de 2020 liu ba, notísia ida título “Horta ‘Futu-Lia’ Ho Ángela Hatún PR Lú Olo”. Ideia ka hanoin ne’e repete fali iha para parágrafu dauluk notísia ne’ebe refere katak “laureadu Nobel da Pás, José Ramos Horta ho portavós grupu Rezisténsia Nasionál Defende Justisa Konstituisaun RDTL, Angela Freitas, hahú ‘futu-lia’ hodi ko’alia kona-ba petisaun atu hatún Prezidente Repúblika (PR) Francisco Guterres Lú Olo”.
Iha parágrafu daruak, Tempo Timor sita estudante universitáriu, J. D. S. Soares da Costa, ne’ebe dehan deskonfia “prezensa Dr. José Ramos Horta nian iha sede da RDNJK” no akresenta katak “dala ruma politikus sira futu lia hodi hatun Xefe Estadu” buat ne’ebe “normal iha pais ne’ebe de’it ema bo’ot sira gosta buka razaun hodi hatun malu nune’e sira mos bele ukun”.
Maibe, tuir kedas, Tempo Timor explika iha notísia katak Ramos Horta “dehan, ninia prezensa iha reuniaun ne’e tanba simu convite husi grupu Rezisténsia Nasional Defede Justisa Konstituisaun RDTL (RNDJK) atu ko’alia kona-ba na’i ulun sira ne’ebé viola Konstituisaun RDTL”.
Iha kraik liu sei refere tan katak “Ramos Horta rasik seidauk deside konkorda ka lae ba petisaun ne’e tanba sei presiza estuda” no akresenta katak nia rasik hateten tiha ona katak “laiha dokumentu ida iha mundu há’u asina taka matan”.
Nune’e, bele konklui katak notísia ne’e nia títulu la iha relasaun buat ida ho afirmasaun sira ne’ebe há’u hato’o, ho bazeia los de’it ba deklarasaun hosi supostu estudante universitáriu ida ne’ebe mos la identifika ho naran rasik.
Hau tristi ke ita bot nudar journalista ke hasoru hau dala barak, iha kantor ka iha uma, bele halo títulu ida ke la reflekte konteudu substansia inkontru ho Sra. Angela Freitas e membrus barak e hau nia dialogue hojornalista sira.
Baseadu ba Artigo 34.º, Lei N.º 5/2014, de 19 de Novembro, Lei Komunikasaun Sosial, há’u husu ba Senhor Diretor Jornal Tempo Timor, atu halo retifikasaun lalais kedas.
Kumprimentus
J. Ramos-Horta
NOTA : Favor Lee Mos artigu iha link, Horta 'Futu-Lia' Ho Ángela Hatún PR Lú Olo
