Horta 'Futu-Lia' Ho Ángela Hatún PR Lú Olo

Eis Prezidente da Republika, Dr. Jose Ramos Horta ko'alia ba Jornalista sira akompana husi portavós grupu Rezisténsia Nasionál Defende Justisa Konstituisaun RDTL, Angela Freitas iha Bairo Formoza Dili (23/7) Eis Prezidente da Republika, Dr. Jose Ramos Horta ko'alia ba Jornalista sira akompana husi portavós grupu Rezisténsia Nasionál Defende Justisa Konstituisaun RDTL, Angela Freitas iha Bairo Formoza Dili (23/7) Foto Tempo Timor

Tempotimor (Dili) - Laureadu Nobel da Pás, José Ramos Horta ho portavós grupu Rezisténsia Nasionál Defende Justisa Konstituisaun RDTL, Angela Freitas, hahú 'futu-lia' hodi ko'alia kona-ba petisaun atu hatún Prezidente Repúblika (PR) Francisco Guterres Lú Olo.

J. D. S. Soares Da Costa, Estudante Universitariu ida iha Dili deskonfia prezensa Dr. Jose Ramos Horta nian iha sede RDNJK.

“Ha’u la halo akuzasaun mas dala ruma politikus sira futu lia hodi hatun Xefe Estadu. Mas ne’e normal iha pais ne’ebe de’it ema bo’ot sira gosta buka razaun hodi hatun malu nune’e sira mos bele ukun,” dehan  da Costa,  iha Kampuz UNTL Dili, Kinta (23/07).

Antes ne’e, iha dadersan, Dr. Jose Ramos Horta iha sede RDNJK iha bairo formoza, dehan, ninia prezensa iha reuniaun ne'e tanba simu konvite husi grupu Rezisténsia Nasional Defende Justisa Konstituisaun RDTL (RNDJK) atu ko'alia kona-ba na'i ulun sira ne'ebé viola Konstituisaun RDTL.

"Ha'u mai iha ne'e tanba simu konvite ne'ebé sira ho inisiativa lejitima seriedade no sira la'ós iha direitu de'it, maibé mós iha obrigasaun para analiza, kritika no kestiona aktu ne'ebé Prezidente Repúblika no Parlamentu Nasionál halo tuir sira-nia interpretasaun viola konstituisaun," dehan nia, hafoin remata reuniaun ho RNDJK, iha Bairru Formoza, Kinta (23/07).

Lider nasional ne'e afirma, prezensa ne'e aprezenta uluk pontu-de-vista kona-ba krize ne'ebé Timor-Leste hasoru.

"Problema ne'e la'ós buat foun tanba iha tempu liuba ha'u ko'alia ona kona-ba abut krize iha ita-nia rain no dalan no solusaun saida", tenik nia.

Tuir nia, inisiativa grupu ne'ebé lideradu husi Ángela Freitas atu kritika no kestiona atu ne'ebé Prezidente Repúblika, Parlamentu Nasionál no Governu halo violasaun ba Konstituisaun RDTL.

"Korpu diplomatiku mós preokupa no hakfodak, ne'e duni lider sira-nia hahalok tenke hanoin no sukat didi'ak tanba ho sira-nia hahalok Timor nia naran monu daudaun iha mundu", dehan Horta.

Nia dehan, problema ne'ebé daudaun RNDJK preoku ne'e, hahu mosu kedas iha momentu Prezidente Republika, Francisco Guteres Lú Olo la fó pose ba membru governu balun ne'ebé mai husi CNRT.

Maske Publiku balun hahu deskonfia, maibe Ramos Horta rasik seidauk deside konkorda ka lae ba petisaun ne'e tanba sei presiza estuda.

"Laiha dokumentu ida iha mundu ha'u asina taka matan, tanba see ema seluk halo ita la komprende asina de'it ne'e problema," dehan nia.

Maski nune'e, eis-Prezidente Republika ne'e mós fó apoiu ba asaun sira ne'ebé Ángela Freitas ho nia grupu halo, tanba konsidera presiza halo asaun hirak ne'e hodi rai Timor bele ba oin, demokrasia bele kle'an no governu bele hala'o servisu diak liután.

"Tanba atu halo mudansa la'os hakilar, baku fila de'it kadeira maibé, presiza estuda hodi halo proposta alternativu", hateten Horta.

Iha sorin seluk, portavoz grupu RNDJK, Ángela Freitas hatete, prezensa Ramos Horta ninia iha soru-mutu ne'e atu reforsa prosesu preparasaun ba petisaun ne'ebé tuir planu sei submete ba Prezidente Republika.

"Prezensa ne'e atu haforsa tan RNDJK atu kontinua nafatin reaforsa povu tomak katak, ita presiza hatur fila-fali ita-nia konstituisaun ne'ebé nai ulun sira viola", tenik Nia.

Nia dehan, prosesu preparasaun ba petisaun dadaun atinji ona 75%, tanba ne'e sei kontinua la'o, kuandu preparadu ona mak sei hato'o ba Prezidente Republika, Francisco Guterres Lú Olo. (*)

https://youtu.be/yb3n_VOawrI

https://www.youtube.com/watch?v=3Wxc7-bNz_8

Rate this item
(1 Vote)
Last modified on Thursday, 23 July 2020 16:08
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.