Deputadu Bankada CNRT Patrocino Fernandes hato'o alegasaun katak, iha tinan 2002, Mari Alkatiri asina Acordo Marítima (CMATS) entre Timor-Leste ho Austrália hodi suspende diskusaun no negosiasaun hotu-hotu sobre disputa Fronteira Marítima durante tinan 50 nia laran.
"Realidade hatudu iha Keixa husi Oceanic Exploration hateten katak, subornu ne’ebé ConocoPhillips fó ba Mari Alkatiri atu halo desizaun ne’ebé prevalese ba kompañia no hatún táxa ne’ebé ConocoPhillips tenke selu mai iha Governu Timor-Leste,"alega nia.
Nia afirma, maiske sekjer fretilin liu husi nia Bankada iha PN rejeita keixa husi Oceanic Exploration ne’ebé sai ona polémika iha ita-nia sosiedade nia laran konaba escândalo subornu no korrupsaun ne’ebé komete hosi Sekretáriu-Jeral Partidu Fretilin Mari Alkatiri.
"Tanba iha Acordo CMATS ne'e konklui ho markasaun ba kampu Greater Sunrise ne’ebé hela de’it 18% mak tama iha área Konjunta entre Timor-Leste ho Austrália nian, enkuantu kampu Greater Sunrise liu 80% tama iha territóriu administrasaun Austrália nian tanba ," deputadu bankada CNRT Patrocino Fernandes hato'o akuzasaun ne'e liu husi deklarasaun politika iha plenaria PN, segunda (6/7)
" Timor-Leste konsege mánan ninia soberania, liu husi Líder Kharismátiku Maun Boot Kay Rala Xanana Gusmão ho nia ekipa iha fulan-Julho de 2019 ratifika Tratadu Fronteira Marítima iha Parlamentu Nasional. Iha plenária ida-ne’e duni no Povu asiste, Fretilin vota kontra ratifikasaun Fronteira Marítima, maske Fronteira Marítima importante ba Timor-Leste hodi kompleta ninia soberania núdar Estadu,"afirma deputadu CNRT ne'e.
Nia mos sadik, Dr. Mari Alkatiri núdar eis xefe do Governo ne'ebe altura ne'eba reprezenta Estadu, atu bele esplika kona ba kontratu no akordu sira, tanba mós dokumentus ne’ebé espalha iha públiku aprezenta dadus kompletu sobre subornu, inklui númeru montante osan ne’ebé mak haruka ba número konta bankaria Mari Alkatiri ho nia alin Ahmad Alkatiri nian.
Nia mos dezafia Eis Primeiru-Ministru Mari Alkatiri atu lori Oceanic Exploration ba iha Tribunal, atu nune’e labele husik “duvidas” ba iha Povu tomak konaba subornu ne’ebé nia simu hosi ConocoPhillips.
"Mari Alkatiri no Partidu Fretilin hasai komunikadu ida iha fulan-Juñu 2008 katak sira sei lori Oceanic Exploration ba Tribunal ho akuzasaun halo difamasaun hasoru Mari Alkatiri. Maibe liu ona tinan 11 públiku Timor-Leste la-rona rezultadu hosi keixa ne’ebé Mari Alkatiri no Fretilin halo hasoru Oceanic Exploration,"hatete nia.
Ikus-ikus ne'e Plenaria PN sai fatin ba furak partidu FRETILIN hodi akuza Prezidente partidu CNRT, Kay Rala Xanana Gusmao. Nune'e mos PN sai abrigu di'ak ba partidu CNRT hodi Du'un sekretaiu Jeral partidu FRETILIN, Dr. Mari Alaktiri.