Komunidade Roger Cardoso hateten, ema ne'ebé laiha fixa familia, tenke selu $10, hodi halo deklarasaun.
"Sira ne'ebé fixa familia laiha tenke ba sosa liu-hosi halo deklarasaun selu $10 no bainhira atu hetan fixa familia tenke selu $2. Horbainrua (08/06) autoriedade lokál sira hatete mai ami katak, bainhira imi la fó, entaun osan terseira idade nian mai sei la simu, sira halo tauk, depois dehan ameasa sei hasai naran husi lista," Roger hateten ba jornalista sira, iha suku Lasaun, Kuarta (10/06).
Nia dehan, iha suku seluk seidauk halo kobransa ba komunidade, maibé iha aldeia Taiubu suku Lasaun maioria komunidade tenke simu realidade, hodi bele hatama osan ho razaun hadi'a dadus.
"Iha komunidade balun ne'ebé naran laiha tenke hatama osan $13, benefisiáriu sira ne'ebé eleitorál husi munisípiu seluk, tenke halo deklarasaun no hatama osan $10, ba sira ne'ebé hare iha lista naran iha tenke hatama mós $10," nia konta tuir.
Hataan ba preokupasaun povu nian ne'e, xefe suku Lasaun, Fernando Nunes rezeita totál katak, autoridade lokál nunka halo kobransa relasiona ho subsídiu $100.
"Ami sedauk informa kona-ba kontribuisaun, rona dadauk KAK ho PDHJ akompaña, nune'e ami seidauk realiza, informasaun ne'e falsu, ami nia osan sei kanseladu sedauk simu iha liman," dehan Fernando.
Xefe suku ne'e mós informa, husi postu administrativu Atsabe liu-liu suku Lasaun no Laklo mak sedauk halo pagamentu ba subsidiu $100 tanbá dadus ne'ebé iha sedauk loos.