Deputadu Bankada PD, Antonio da Conceição hatete, relasiona ho impase polítika ne'ebe agora Timor hasoru povu mak kontinua sai vítima.
"Situasaun atuál ami hanesan bankada ou partidu preokupa tanba situasaun sira ne'e afeta ba ema barak nia moris, liuliu populasaun nia moris", dehan nia, Uma Fukun Parlamentu Nasionál, Tersa (28/1).
Deputadu atuál ne'e esplika, efeitu husi impase politika ne'e, dadaun realidade akontese hanesan ema sira ne'ebé fa'an sasán la folin, normalidade relasaun ema haree malu la di'ak no iha ambiente servisu la iha motivasaun tanba iha hela situasaun inserteza.
Nune'e, PD hanesan reprezenta povu iha uma fukun sente preokupa tebes ho situasaun sira hanesan ne'e, entau presiza fó liman ba malu hodi bele hakotu lalais impase ne'e, se lae halo terus povu.