Max Sthal sai nu’udar jornalista ida ne’ebé iha papel importante hodi fó sai Masakre Santa Kruz, 12 Novembru 1991, ba mundu tomak hodi hatene.
Planu atribuisaun sidadania espesial ne’e sei realiza iha 10 Dezembru ne’ebé mós sai nu’udar loron direitus umanus.
"PN sei halo votasaun no aprovasaun ba atribuisaun sidadania espesiál ba señor Max Stahl tuir rekomendasaun husi sua exelénsia Prezidente Repúblika (PR) nian, tanba ne'e iha loron 10 Dezembru semana oin nu'udar mós loron direitus umanu nian, nune’e ami sei aprova ida ne'e ho rezolusaun ida hodi entrega sidadania espesiál ba señor Max Stahl," informa Prezidente Parlamentu Nasional Arão Noé de Jesus da Costa Amaral, iha PN, Kinta (05/12/19).
Atribuisaun sidadania espesial ba Max Sthal, Arão dehan, nu’udar rekoñesimentu no onra husi Timor Leste ba ninia kontribuisaun hahú kedas iha 1991 to'o ohin loron.
"Max Stahl nia kobtribuisaun dezde 1991 to'o agora nia sei hela nafatin iha ne'e ho nia familia. Ida ne'e sujestaun PR, entaun PN konsidera, nune'e ajenda tau iha loron 10 Dezembru, semana oin," Arão afirma.