Print this page

Fidelis sei Hato’o Komunidade Meligo Nia Halerik ba PM Taur

Ministru, Fidelis Leite Magalhães dialogu hela ho komunidade sira iha Suku Meligo, kinta (22/09). Ministru, Fidelis Leite Magalhães dialogu hela ho komunidade sira iha Suku Meligo, kinta (22/09). Foto Tempo Timor

Tempotimor (Bobonaro)-Ministru Prezidénsia Konsellu Ministru (MPKM), Fidelis Leite Magalhães kompromete sei lori komúnidade husi Suku Meligo, Postu Administrativu Cailaco, Munisípiu Bobonaro nia halerik ba Primeiru Ministru (PM), Taur Matan Ruak no relata iha Konsellu Ministru.

Tanba, komunidade sira hato'o preokupasaun ba governu liu husi dialogo nasionál entre organizasaun sosiedade sivil ho VIII governu konstitusionál ne'ebé realiza iha suku Meligo, Postu Administrativu Cailaco, Munisípiu Bobonaro.

Tuir ajenda, primeiru Ministru (PM), Taur Matan Ruak mak prezensa, maibé tanba iha konflitu ajendamentu, entaun delega fali  Ministru Prezidénsia Konsellu Ministru (MPKM), Fidelis Leite Magalhães mak marka prezensa.

"Maibé, ha'u promete lori Primeiru Ministru (PM) nia naran katak, ami sei rekolla hotu ita-boot sira nia pontu de vista, rekomendasoin sira, para ami lori ba hato'o ba PM no relata ba iha Konsellu Ministru ba pontus ne'ebé ita hetan husi diskusaun ida ne'e", dehan Fidelis, iha ambitu diskusaun dialogo nasionál iha suku Meligo, kinta (22/09).

Nune'e sente honradu reprezenta Primeiru Ministru (PM), Taur Matan Ruak hodi marka prezensa iha komúnidade nia leet hodi rona direita preokupasaun sira hotu.

"Ita nia PM la prezensa, la'ós tan eventu ne'e la importánte, maibé tanba iha konflitu ajendamentu, maibé ha'u reprezenta ita nia PM, sei rona ita-boot sira nia preokupasaun no sei lori fali ba hato'o", nia dehan

Iha fatin hanesan, sefe suku Meligo Amancio Barreto sente kontente ba prezensa VIII governu nia iha komúnidade Meligo nia leet, tanba liu husi prezensa ne'e komúnidade sira bele hato'o direita sira nia preokupasaun ba iha governu.

"Ha'u sente kontente, tanba VIII governu bele marka prezensa iha komúnidade sira nia leet, nune'e komúnidade sira bele hato'o direita preokupasaun ne'ebé mak iha ba governo sira", nia orgullu

Nu'udar líder komunitariu hakarak husu mós ba governu atu bele haree didiak dalan, liña eletrisidade, edukasaun no saúde, hodi tau ba iha planu, nune'e bele rezolve netik hodi fasilita komúnidade sira nia preokupasaun.

Aleinde ne'e mós, reprezenta komúnidade Suku Meligo, José da Costa, afirma, problema prioridade ne'ebé sira enfrenta mak dalan, liña eletrisidade, bee mós, edukasaun no saúde.

"Problema dahuluk ne'ebé ami infrenta mak estrada, liña eletrisidade, bee mós, edukasaun, no saúde, ami presiza dalan di'ak hodi ami buka moris viajen ba mai merkadu fa’an sasán ho di'ak, ami presiza hemu bee mós, ami presiza naroman, tanba ita ukun an ona, maibé tanba sa ami seidauk sente naroman iha tempu kalan, liuliu edukasaun ba ami nia oan sira, inklui sentru saúde ne'ebé ami hakarak loke besik ami", nia informa

Entretantu Suku Meligo kompostu husi aldeia Haat, hanesan aldeia Model, liabote, Bereleu no Daulele, ho xefe família hamutuk 800, maibé família 200-resin de’it mak asesu ona ba liña eletrisidade, restu seidauk. (*)

Rate this item
(0 votes)
Last modified on Thursday, 22 September 2022 14:40
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items