"Sim, ne'e enkontru semanal no ha'u mai relata ba PM, kona-ba atividade saida de'it mak Ministeriu halo relasaun ho servisu sira ne'ebé mak durante ami hala'o, liuliu vizita sira ne'ebé halo ba iha suku sira, hanesan atividade governu iha povu nia leet", dehan Ministru Francisco, iha Rezidensia ofisiál PM Farol, segunda (19/09).
Governante presiza relata atividade ne'e ba iha primeiru Ministru, tanba nia lori programa "governu iha povu nia leet" ne’e, komúnidade, sefe suku no sefe aldeia sira husu atu kontinua nafatin programa ne'e, iha sira nia suku no labele remata.
"Tanba ne'e, xefe governu presiza hatene saida mak povu hakarak, nune'e komúnidade sira husu atu harii sentru informasaun iha sira nia suku, tan hirak ne'e ha’u hato'o ba PM, eh PM apresia katak, ne'e presiza, tanba ita nia komúnidade presija informasaun no sira presija governu rezolve problema sira ne'ebé hasoru iha sira nia komúnidade", nia afirma
Aleinde ne'e informa mós ba PM, kona-ba atividade infrastrutura no hato'o mós progresu konstrusaun ba uma RTTL, EP ninia ne'ebé prosesu la'o hela.
"Ita informa ba Primeiru Ministru (PM), nune'e PM mós akompaña no mós informa ba nia kona-ba torre ne'ebé tama ona iha prosesu ne'ebé iha ona aprovizionamentu iha CAN, eh hein katak, bainhira loke tenderizasaun hotu ita sei hahú konstrusaun iha tempu badak", nia informa
Entretantu (Programa governu iha povu nia leet) ne'e, partisipasaun masimu tebes, tanba dalaruma mai partisipa la’os ema ida rua de'it, maibé besik to’o rihun mak mai partisipa eh sira hotu nia preokupasaun barak liu mak kona-ba saúde, edukasaun, estrada, bee mós eletrisidade, ho agrikultura.
Maske nune’e, kada ministru sira ne'ebé relevante ba asuntu hirak ne'e sempre prezensa hotu iha programa refere, entaun asuntu saida mak povu husu hetan ninia solusaun. (*)