Ministru, Francisco husu media ne'ebé dezentraliza iha Munisípiu tenki adapta ho situasaun real ho preparasaun kondisaun sira husi governu.

"Tanba ne'e, ba oin MAPKOMS hakarak media ne'ebé dezentraliza iha Munisípiu labele para iha ne'e, tenki adapta ho situasaun real, governu prepara kondisoens atu bele kompleta liu-liu iha mundu digital," dehan nia hafoin halo lansamentu ba livru iha Manufahi, kinta (15/09).

Programa rua ne'ebé importante mak, boa governasaun ho liberdade espresaun no liberdade imprensa, tanba media mak sai fatin hato'o ema nia hanoin no atu fahe tutan situasaun ne’ebé akontese bae ma hotu atu hatene.

MAPKOMS mós iha programa ida hanaran naroman ba suku, ne’ebé la'o dadaun ona la'os atu lori de'it naroman, maibé lori mos informasaun kona-ba atividade hotu governu nian.

Nune’e, agradese mos ba administradór munisípiu, tanba bele fo fatin ba media sira, nomós husu ba jornalista sira iha Munisípiu Manufahi atu fo sai informasaun ho lais, lolos, kredibel no ho responsabilidade.

Administradór munisípiu Manufahi, Arantes Isaac Sarmento mós hateten, kona-ba lansamentu ne’e, sai mós forsa ida ba munisípiu Manufahi, tanba liu husi dalan ida-ne'e bele hatutan informasaun kona-ba atividade hotu ne'ebé Munisípiu hala'o ligadu ho polítika desentralizasaun.

Tanba, edifísiu administrasaun munisípiu Manufahi nian sei kontinua nakloke ba media hotu atu  hamutuk lori informasaun ne'ebé los no di'ak ba komunidade sira.

Lansamentu ne'e, hetan partisipa husi administrador munisípiu Manufahi, reprezentante administrador Ainaru, reprezentante administrador Aileu, Presidente KI, kargu chefia sira husi MAPKOMS nian no funsionariu Administrasaun Manufahi. (*)