“Orsamentu previstu ou planeadu ba 30 de agostu ne'e, besik $90 mil dólare amerikanu e ida-ne'e despeza sira halo ona, besik ona fulan-ida”, dehan nia hafoin audénsia ho Prezidente Repúblika, José Ramos Horta, iha Palásiu Prezidensial Bairo Pite, sesta (26/08).

Husi total orsamentu ida-ne'e, dadauk Komisaun Organizadora uza ba eventu desportu sira iha Suku no iha Postu Administrativu sira nomós eventu semináriu Nasionál ne'ebé dadauk la'o hela iha Sentru Konvensaun Dili (CCD) inklui mós utiliza ba misa agradesimentu no Kari aifunan iha tasi-ibun no marsa saudavel, inklui serimónia ikus iha Jardim 5 de maiu.

Ba preparasaun hira ne'e, Prezidente Komisaun Organiadora (KO) ba Komemerasaun Loron Konsulta Popular dala-23, Minguel Pereira de Carvalho, iha loron sesta (26/08) hasoru malu ho Prezidente Repúblika (PR), José Ramos Horta hodi atualiza ba Xefe Estadu ba atividade sira ne'ebé sei hala'o iha komemerasaun ida-ne'e.

Tanba hanesan públiku tomak hatene, to'o momentu ida-ne'e, Komisaun Organizadora halo preparasaun namanas hela, kona-ba atividade komemorativa iha Suku, Postu Administrativu sira liliu iha Dili, atubele komemora loron importante konsulta popular nian ba ala-23.

Tanba ne'e, Komisaun Organizadora mós informa ba Prezidente Repúblika katak iha dia 29 loraik tuku 4 sei iha misa agradesimentu ida iha uma kreda katedral-Dili, no wainhira misa remata, husu sarani sira ne'ebé mak tuir misa hamutuk ho populasaun ne'ebé disponível, atu hakbesik-an hotu ba partisipa serimónia kari ai-funan iha Tasi-ibun Palásiu Governu nia oin.

Purtantu ih 30 agostu, Komisaun Organizadora mós konvida ema hotu inklui populasaun sira hothotu liliu sira ne'ebé iha Díli katak entre tuku 7 to'o 8, ema hotu tenke konsentra ona iha rotunda saudozu Francisco Xavier Amaral nian oin atu halo marsa saudavel husi resintu rotunda Saudozu Francisco Xaivier Amaral nian ba to'o iha Santa Krus, depois tun fali ba termina iha Jardim 5 de maiu.

Bainhira to'o iha jardim 5 de maiu mak foin hahú serimónia, ne'ebé preparadu husi Komisaun Organizadora.

Iha serimonia ikus ne'e, Komisaun Organizadora mós hato'o ona pedidu ida ba Prezidente Repúblika atu prefere diskursu ida iha ne'ebá, fó mensajen ba Povu no nasaun, kona-ba loron importante ida-ne'e.

“Prezidente Repúblika dehan katak disponivel atu ba marka prezensa iha Jardim 5 de maiu atubele prevee palavras iha serimónia ida-ne'e”, hatete nia. (*)