Print this page

PM Taur Konsidera Horta Vizita Eurico Bazeia ba Polítika Xanana

Prezidente Repúblika, José  Ramos Horta, kaer liman hela ho Lider Timoroan sira iha Timor Osidental. Prezidente Repúblika, José Ramos Horta, kaer liman hela ho Lider Timoroan sira iha Timor Osidental. Foto Suplay

Tempotimor (Dili)-Primeiru Ministru (PM), Taur Matan Ruak hatete, Prezidente Repúblika, José  Ramos Horta hala'o vizita ba Vise-Komandante Milísia pró-Indonésia (Wakil Panglima Pro-Indonesia), Eurico Guterres, iha kapitál Kupaun ne'e bazeia ba polítika Kay Rala Xanana Gusmão.

“Ne'e bazeia ba polítika ne’ebé maun Xanana uluk halo no ita-hotu halo katak, funu hotu ona ita hotu mesak Timoroan halo nusa mak tenke hamutuk para dezenvolve rai ne'e”, dehan Taur iha Palásiu Prezidensiál Bairo Pite, kinta (11/08).

Ba inisiativa ne'e, nu'udar Xefe Governu sente kontente loos, tanba ne'e ezemplu di'ak ba timoroan hotu liliu ba joven sira atu iha prinsípiu ida, ema ne’ebé manán tenke jeneroju (hakaraik-aan ka hakuak) ba sira ne’ebé lakon.

Tanba ne'e Timoroan sira tenke jeneroju atu simu malu tanba Timoroan sira ba Indonézia, eis autonomista sira la duni, maibé sira mai fali Timor mak Timoroan duni fali mós ladun di'ak.

“Pas estabilidade ne'e mai husi ita-nia kooperasaun ka rekonsiliasaun. Ida-ne'e ezemplu boot ida iha mundu, entaun se Timor ho Indonézia bele tanba saida mak Timor ho Timor labele hakuak malu fali”, afirma nia.

Ho situasaun hirak ne'e, nu’udar jerasaun tuan halo hanesan ne'e tanba tempu ba sira la naruk ona, tanba ne'e husu nafatin joven sira labele hanoin beibe'ik atu rai odiu ba malu.

“Imi joven sira mai ne'e labele ba tuku malu fali, se imi tuku malu ne'e rai klo'ot ona ba imi. Ne’ebé ita elojia no ezemplu di'ak ba joven sira aban bainrua tenki banate tuir ida-ne'e. Ne'ebé tempu liu ona ne'e liu ona ita haree mak futuru, futuru ita-nia oan sira-nian ne'e mak importante”, hatete Taur.

Antes ne'e, Prezidente Repúblika, José Ramos Horta hatete, kona-ba reuniaun ne'ebe nia ho ekipa delegasaun hala'o ho eis autonomista sira iha Indonézia hatudu reuniaun ne'ebe kapas tebes tanba hothotu iha duni vontade hakarak hakotu problema ne'ebé akontese iha pasadu.

“Iha domingu kalan hasoru malu ho elementu Timorense, ko'alia ho Eurico Guterres, Joanico no barak tan ke ha'u la lembra sira-nia naran, ne’ebé konsikuénsia 1999 sei iha ne'ebá, reuniaun la'o di'ak loos no hatudu ona ita hothotu nia fuan no sentimentu la'ós hanesan 1999 maibé buat hothotu muda, no sira mós kontente loos ho enkontru ne'e”, hatete nia.

Ho rezultadu reuniaun ida-ne'e, Xefe Estadu fiar katak iha tempu badak hothotu konkorda para taka duni problema sira iha 1975-1999. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items