“Ohin ha'u enkontru ho Primeiru Ministru (PM), Taur Matan Ruak, asuntu ne'ebé ohin ami ko'alia mak ha'u hato'o servisu iha PN relasiona ho PN hakarak husu Governu atu atribui prioridade rai ba PN hodi bele hari’i edifísiu foun iha futuru, entaun iha ne'e ami halo diskusaun, ha'u, Ministru Asuntu Parlamentár no Komunikasaun Sosiál ho Ministru Finansas nomós Ministru Justisa hasoru malu ona ho Prezidente Parlamentu Nasionál, ita halo diskusaun, e iha ona solusaun katak, rai ne'ebé mak atu uza ne'e mak ida iha Hera, ektare 10 Governu mós prontu ona atu aprezenta e iha tempu badak sei halo atribuisaun”, dehan Ministru Francisco, hafoin hasoru malu ho PM Taur, iha Rezidénsia ofisiál PM, Farol, segunda (01/08).

Maske nune'e, antes atu halo atribuisaun sei halo uluk levantamentu tékniku hafoin bele entrega ba Parlamentu Nasionál halo konstrusaun ba Edfifísiu foun.

“Sei iha uluk lai levantamentu tékniku ne'ebé mak tenke halo e ba rai ne'e nomós haree saida mak atu halo ba komunidade ne'ebé mak okupa hela rai Estadu nia, ida-ne'e mak haree hela, oinsá mak atu fó, ida-ne'e mak tenke iha dadus ne'ebé lolos, e haree hotu ba ida atu nune'e bele haree ne'e lolos atubele fó solusaun ne'ebé mak di'ak ba komunidade sira”, afirma nia.

Tuir Informasaun ne'ebé iha ne'e katak uma-kain hamutuk besik atusrua-resin, mais ne'e sei informasaun de'it seidauk identifika lolos, tanba iha ne'ebá la'ós uma de'it maibé mós iha toos no natar.

“Depois mak ita tau orsamentu para bele halo indemnizasaun (ganti rugi)”, hatete nia.

Nune'e tuir Prezidente Parlamentu Nasionál (PN), Aniceto Longuinhos Guterres Lopes katak iha tinan 2023 hahú ona halo lansamentu fatuk dahuluk, antes mandatu lezislatura dalima remata.

Entretantu orsamentu ba estudu viabilidade hamutuk porvolta de 500 mil ($500.000) ne'ebé mak tau hela ona, maibé orsamentu sira ne'ebé seluk atu ba halo Konstrusaun sira ne'e seidauk. (*)