“Governu liuhusi Embaixada iha Portugal agora tenta hela atu negósia ho Governu Portugéz atu ita bele iha akordu bilaterál ho Portugal, tanba to’o agora timoroan sira uza pasaporte Timór ba de’it iha ne’ebá maibé la hatene atu ba serbisu iha ne’ebé, buka asuntu sira ne’e komplikadu oituan. Tanba ne’e mak Embaixada iha Portugal tenta ona atu asina akordu bilaterál atubele fasilita timoroan sira ba serbisu iha Portugal ho pasaporte Timór”, dehan Ministra Adaljiza, hafoin hala’o reuniaun ho Primeiru Ministru, Tau Matan Ruak, iha Rezidénsia Farol, segunda (30/05).

Nune'e mós, Ministra rasik lori ona tratadu mobilidade CPLP ba Parlamentu Nasionál (PN) ne’ebé prosesu la’o hela atu bele simu timoroan hanesan traballadór sezonál.

“Ha’u lori ona tratadu ida ba Parlamentu Nasionál kona-ba mobilidade Komunidade País ho Lian Portugés (CPLP, sigla portugés), ne’ebé bazeia ba tratadu ne’e ita bele halo akordu ho nasaun membru CPLP sira inklui Portugal hodi ita bele formaliza tiha timor-oan sira ba serbisu iha ne’ebá, bele mós sira simu hanesan traballadór sazonál hanesan Governu haruka ba Austrália, agora prosesu hela”, informa nia.

Tanba tratadu ne’e presiza depozita mak sei lori ba sede CPLP hodi depozita akordu refere, hafoin rekoñese akordu vigor, maibé ko’alia ho Governu Portugeza atubele formaliza.

“Akordu ne’e presiza depozita, ha’u rasik tenke lori ba sede CPLP hodi depozita akordu ne’e. Husi ne’e, kuandu rekoñese akordu vigora ona, entaun ita presiza ko’alia ona ho Governu Portugéz hodi formaliza akordu entre país rua, hodi timoroan sira ba serbisu iha Portugal. Fulan oin ha’u sei vizita traballu ba Eropa no ha’u sei liu Portugal atu depozita tratadu ne’e iha Sekretáriu Ezekutivu CPLP hodi formaliza ita-nia akordu”, esplika nia.

Bainhira akordu ne’ebé iha formaliza ona Governu Timor-Leste sei informa ba nasaun membru CPLP hotu katak Timor-Leste prontu atu negósia akordu bilaterál mobilidade.

“Mobilidade ne’e inklui traballadór hotu, tantu skill no non skill, tanba Portugal nu’udar Timór nia belun boot, entaun sira mós hakarak ita bele iha akordu non skill. Vantajen husi akordu ne’e ba Timór mak estudante sira bele ba-mai iha nasaun membru CPLP hodi eskola, funsionáriu sira ezempu médiku sira bele apply ba serbisu iha rai CPLP, nune’e mós dosente. Iha modalidade lima, maibé laiha ba non skill, maibé Portugal hakarak nakloke simu timoroan non skill, bazeia ba ida-ne’e ita bele loke klauza ida ho sira hodi promete atu altera sira-nia lei atu fasilita timoroan sira”, afirma nia. (*)