Diretór STAE Baukau, Lucio Salvador Freitas, hatete, brigadista husi orgaun eleitóral ho lema imparsial no neutralidade iha direitu atu ajuda ema ho difisiensia ne'ebé presiza tulun husi ema seluk atu vota, maibé fiskais laiha direitu.

"Fiskais sira laiha direitu atu ajuda difisiensia sira, tanba lei la fó ita ajuda sira, tanba lema ne'e mak fó dalan ba ita para ajuda sira," dehan Lucio iha salaun STAE Baukau, segunda (18/04).

Durante prosesu eleisaun, Prezidente sentru votasaun iha kompetensia tomak foti desizaun ba kualkér situasaun mosu iha sentru votasaun.

"Sira nia desizaun ha'u sei asegura iha Munísipiu, la'os ha'u mak asegura sira lei eleitóral mak asegura," nia akresenta

Parte PNTL iha sentru votasaun fó segúransa, tanba ne'e Prezidente sentru votasaun tenke ho ordem klaru, tanba lei hatete, prezensa segúransa parte PNTL ho F-FDTL iha sentru votasaun ne'e proividu.

"Proividu ne'e, signifika katak, kuandu ita fó orientasaun mak foin marka prezensa iha ne'eba, sira (segúransa) iha 25 metrus husi sentru votasaun," nia hatete

Nune'e, Komadante Komandu PNTL Munísipiu Baukau, Superintendente António De Sá, husu brigadista sira atu servisu hamutuk ho membru PNTL ne'ebé destaka iha sentru votasaun liuhusi komunikasaun bainhira mosu presaun husi grupu individus ruma hato’o kedas ba parte PNTL.

Bainhira mosu krime eleitóral, eleitóres balun uza atributu kandidatu Prezidente Repúblika nian, kompetensia parte STAE ho CNE nian PNTL sei la halo intervensaun, maibé PNTL fó de’it segúransa ba prosesu eleisaun bainhira mosu perturbasaun.

Membru PNTL fó segúransa ba prosesu eleisaun to'o remata iha loron 19 fulan-abril tinan-2022 (aban) ho distánsia metru 25 husi sentru votasaun tuir lei difini, tanba ne'e husu eleitóres labele tenta halo perturbasaun durante prosesu eleisaun la'o.

"Eleisaun ida ne'e, difini estadu ninia futuru, ne'e ístoria ne'ebé aas liu, ne'ebé ita sei la toléra, tanba ne'e husu kolaborasaun servisu hamutuk," nia hakotu (*)