Xefe Departementu Adminisitrasaun Finansan Lojistiku, João Freitas da Silva, husu ambulansia sira labele hatun hela matérial siensetivu sira iha dalan bainhira simu kontaktu ruma husi pasiente atu ajuda.
"Transporta husi sentru votasaun mai Baukau, to'o iha dalan klaran ema telefone ba tula ema moras, entaun sasan siensetivu hatun iha dalan ida ne'e perigu tebes," dehan João iha salaun STAE Baukau, segunda (18/04).
Tanba ne'e, husu parte seguransa Polísia Nasionál Timor-Leste (PNTL) Munísipiu Baukau ne'ebé akompañia matérial siensetivu husi sentru votasaun ba apuramentu Munísipal, atensaun labele orienta atu hatun hela matérial siensetivu iha dalan ba tula fali pasiente.
"Ema ida moras la liu ema nia votus ne'ebé wain teb-tebes ne'e, ne'e estadu nia sasan, ne'ebé ema ida moras la liu ita nia votus barak teb-tebes," nia afirma
Bainhira akontese save urnas ida kotu, fiskais husi kandidatu sira bele halo asaun hasoru ékipa ne'ebé akompañia matérial siensetivu.
Membru PNTL ho nia komadante atu haree, bainhira hasoru problema ne'e, informa ba STAE Munísipal hodi foti medidas atu labele failla iha tereñu.
Nune'e, komadante Komandu PNTL Munísipiu Baukau, Superintendente António De Sá garante sei laiha karreta ambulansia ida mak sei hatun hela matérial siensetivu iha dalan ba atende pasiente.
"Ha'u rasik hanesan komadante Munísipiu asegura ékipa task force iha oin ho Diretór STAE, CNE ita asegura, tanba ne'e Xefe Estadu, erru ida ne'e sei la akontese", nia akresenta. (*)