“Ami estudante konsidera STAE ho CNE halo diskriminasaun boot mai ami nu'udar estudante nomós komunidade enjerál ne'ebé husi munisípiu mai buka moris iha Dili”, dehan Portavoz Estudante, Rosario Elizario Ximenes liuhusi konferénsia imprensa iha Jardin 5 de maio, sábadu (02/04).

Tanba iha eleisaun promeiru volta, estudante barak mak lakon sira-nia la konsege ezerse direitu hodi vota ba kandidatu PR 16, tanba STAE no CNE momentu ne'eba la halo sensibilizasaun ne'ebé mak klaru atu estudante sira bele ba rejistu iha sentru paralelu hodi ezerse sira-nia direitu iha loron 19 marsu.

Ho ida ne'e, eleisaun prezidensiál períodu 2022-2027 iha segundu volta ne'ebé mak sei kompete husi kandidatu na’in-rua hanesan José Manuel Ramos Horta ho Fransisco Guterres ‘Lú Olo,’ mak estudante sekundáriu no universitáriu husi Munisípiu 12 inklui RAEOA, ne'ebé hala'o estudu iha kapitál Dili, hakarak hato'o preokupasaun ba STAE no CNE tenke hadi’a sira nia jestaun.

Tanba ne’e, sentru votasaun paralelu nu’udar alternativu ida ne'ebé Governu liuhusi Ministériu Administrasaun Estatal hamosu atu solusiona estudante no inan aman sira ne'ebé hala'o estudu no buka moris iha Dili, maibé STAE rasik deklara katak sei laiha tan rejistrasaun ba sidadaun sira ne'ebé antes ne'e la vota iha sentru votasaun paralelu no tenke fila ba munisípiu.

“Tanba ne'e hanesan estudante hakarak hato'o ami-nia preokupasaun katak STAE no CNE presiza hadi'a jestaun ho di’ak hodi kontinua loke sentru votasaun paralelu hodi fasilita ami estudante universitáriu sira atubele vota iha Dili”, dehan nia.

Husu nafatin ba STAE no CNE labele hamosu konfuzaun no dikriminasaun ba sentru votasaun tanba haree katak sentru votasaun sira iha diaspora/estranjeiru, Governu atende di'ak liu duke Sentru votasaun paralelu iha Dili. (*)