“Ha’u-nia naran agora dadauk tama ona iha lista rezigansaun ka remodelasaun, maibé ha’u atu apela ba sidadaun hothotu, sé mak agora hakarak ba tur iha kargu membru Governu troka ha’u agora iha tinan ida nia laran ka fulan hira nia laran ne'e, nia ema ne'ebé bulak. Tanba saida, ba hatuur kidun manas palin hader aban nia hamri’ik filafali”, dehan nia iha Kampaña Eleitorál ba Kandidatu Prezidente Repúblika José Ramos Horta iha Postu Administrativu Maliana, Munisípiu Bobonaro, kinta (10/03).
Tanba ne'e, husu atu lalika politiza sasán hodi taka povu nia matan, liuhusi remodelasaun ba membru Governu, tanba públiku tomak hatene no sente katak Governu ida ne'e nia mandatu besik remata maibé la halo buat ruma ba povu.
“Ne'ebé inan aman sira, ema ida moe laiha mak ha’u, maibé tanba ha’u hatene moe ne'e mak ha’u rekoiñese ba imi katak oitavu Governu ne'ebé ha’u pertense ba la halo buat ida, iha rai ida ne'e”, esplika nia.
Iha loron tersa (08/03), Primeiru Ministru (PM), Taur Matan Ruak, deside sei hasai membru Governu balun hodi hili membru Governu foun atubele aselera programa Governu iha tinan 2022 to’o 2023.
“Sei iha remodelasaun, mais ha'u hanoin iha tiha ba, mak ita-boot sira haree ami sei hatete ba ita-boot sira, ne'e la'ós daun ne'ebé ami subar ba ita-boot sira ami subar ba imi kuandu iha ne'e imi sei hatete remodelasaun ne'e sé, se mak sai se mak tama iha área ida ne'ebé iha Ministériu ida ne'ebé inklui sei hatene”, hatete PM Taur iha Ministériu Finansas Aitarak laran, tersa (08/03).
Kona-ba lista ema nain hira mak sei hasai ne'e PM Taur seidauk ko'alia maibé identifikadu ona katak sei Remodela Membru Governu balun.
“Lista ha'u la simu tanba desizaun ne'e ha'u mak sei deside, tanba ne'e to'o tempu ita-boot sira haree”, esplika nia.
Kona-ba razaun Remodela ne'e PM Taur seidauk esplika iha tempu badak, no sei deklara sai ba públiku, tanba remodelasaun ne’e Governu sei la subar.
“Ba ha'u hanoin to'o tempu ha'u sei esplika ba ita-boot sira tanba saida mak Remodelasaun ne'e ábitu normál remodelasuan ne'e Governu ida sempre halo iha tempu ba tempu halo se ita-boot sira haree, mezmu hein fila ida de'it atu nia mandatu hotu mós bele halo”, dehan nia.
Tuir informasaun ne’ebé fó sai husi fonte envolve iha Partidu Koligasaun ba Governu daulau katak, remodelasaun ne’e akontese, tanba haree ba servisu Ministeriu balu ne’ebé ladún efetivu.
Ba membru Governu sira ne’ebé mak sei Remodela Fonte ne’e konfesa katak, iha Ministru, Sekretáriu Estadu no Vise Ministru husi Partidu Libertasaun Popular ne’ebé sei akontese uluk, hafoin bele haree fali membru Governu husi Partidu FRETILIN no KHUNTO. (*)