“Ita-nia Kandidatu temi tiha ona, violasaun Konstituisaun, e prezidente agora ne'e, nia prezidente asembleia konstituente iha 2001, nia mak iha devér liu, hatutan ezemplu di'ak ba prezidente sira seluk, maibé nia hakerek tiha ita-nia konstituisaun, sa'e tiha ba Prezidente, kaer konstituisaun tur tiha fali iha leten”, deklara Xanana liuhusi iha aberta Kampaña Kandidatu Ramos Horta, iha Postu Administrativu Lospalos, Munisípiu Lautein, kuarta (02/03).

Tanba hanesan públiku hatene katak konstituisaun nu’udar lei inan ne'ebé aas liu, fahe kompeténsia kada ba orgaun soberanu sira hanesan Prezidente Repúblika, Parlamentu Nasionál, Governu no Tribunál atu bele la'o tuir.

Problema violasaun ne'ebé Prezidente Repúblika Lú Olo komete ne'e la’ós foin dala ida, maibé ne'e ba dala tolu ona, liliu kona-ba pose ba membru Governu sira.

Maibé tanba sá reitea husi koligasaun tanba CNRT hanesan partidu ida iha prinsípiu rasik, no iha vizaun ida atu servi rai ho povu, maibé la'ós atu hetan kargu sai Ministru ka sai membru Governu.

Tanba ne'e, CNRT retira no lakohi atu sai aliadu ba ema ne'ebé la haree povu, no pior liu Governu daualu hatama de'it nia ema no hatama de'it nia família.

“Sai tiha ona Ministru, sai tán vise Primeiru Ministru. Koligasaun foun partidu balun tama maibé sai filafali de'it tanba Ah o nia fen sai Vise Primeira Ministra, ne'e partidu laiha prinsípiu”, dehan Xanana.

Kandidatu Prezidente Repúblika (PR) períodu 2022-2027, José Ramos Horta prontu simu mandatu hodi disolve Parlamentu Nasionál (PN) hodi hakat ba Eleisaun antesipada.

“Ha’u simu mandatu disolve Parlamentu Nasionál forma Governu foun hodi servisu hamutuk hadi’a povu ki'ik nia moris, hadi’a nutrisaun inan ho labarik sira, dezenvole Arte Marsiál ho Arte Rituál atu kuda paz ho estabilidade iha rai Timor”, dehan nia iha kampu futebol, Suku Fuiloru, Postu Administrativu Lospalos, Munisípiu Lautein, kuarta (02/03).

Kandidatu Horta akuza Lú Olo hodi dehan, “Ha’u ko’alia simples ba ida ne'e, krize iha rai ida ne'e la’ós ema seluk mak hahú, maibé krize ne'e hahú wainhira Prezidente Repúblika iha kontestu ita nia konstituisaun, sistema semi prezidensiál, no viola konstituisaun ne'e bainhira la fó pose ba membru Governu CNRTe na'in-rua KHUNTO, problema hahú iha ne'ebá”, hatete nia.

Durante tinan rua resin krize la’o, ho prezidente repúblika nia halo-halok imapktu boot ba dezenvolvimentu iha rai laran, tanba membru Governu na'in-7 husi CNRT no na'in-rua husi KHUNTO la hetan pose.

Tuir loloos, desizaun la fó pose la’ós kompeténsia Prezidente Repúblika nian, iha sistema semi prezidensialista, maioria iha Parlamentu mak hili Governu, ka viabiliza Governu.

“Prezidente hili Primeiru Ministru ne'ebé mai husi partidu ne'ebé hetan votu liu ou hetan maioria iha Parlamentu laran, e Prezidente fó pose, e fó pose ne'e ba Priemiru Ministru, fó pose ba membru Governu, mak ne'e de'it”, dehan nia. (*)