“Ha'u hakarak atu husu ba señor ministru asuntu parlamentár liga ho dekretu lei suplementu remuneratóriu ba funsionáriu, ajente, e traballadór sira. Iha preambulu dekretu lei atu fó sira remunerasauni ida para fó prevensaun no imetigasaun ba Covid-19. Intensaun Governu nian ne'e di'ak, mais na realidade ezekusaun muito pobre”, dehan Deputada CNRT, Maria Fernanda Lay, iha plenária PN, segunda (04/10).

Durante ne'e, funsionáriu, médiku, ajente, no trabaladór barak mak servisu liña frente, atu kontra no prevensaun ba saúde públika husi pandemia iha Timor-Leste, maibé Governu la selu.

"Maibé sé ministru hatete fali dehan la selu agora, sei la lakon, be sira ne'ebé moras kona, tanba ai-hán labele di'ak para prevene, tanba sistema remuneratóriu ne'ebé ita-boot sira selu atraza ne'e, sé mak responsabiliza, ida ne'e mak problema boot”, dehan nia.

Maske nune'e, Bankada CNRT mós simu informasaun  katak, Diresaun Jerál Ministériu Saúde, mós oras ne'e dadauk, sira simu ona lista, maibé seidauk haruka ba Ministériu Finansa, lahatene tanba sá.

"Be hothotu hanesan ka, polísia ho sira lubuk ida tan iha ne'e, hanesan hotu ka seu ministru. Porque to'o agora depois de ami check, sira hotu seidauk simu, dekretu lei hadi'a, depois lista devia preparadu, ida ne'e mak komplikadu”, afirma nia.

Tanba ema ne'ebe servisu iha liña frente mós presiza buka ai-hán di'ak maibé ho osan remunerasaun ne'e, no ikus sira tenke hein, gasta rasik sira-nia osan hodi sosa ai-hán ne'ebé sira tenke alimanta (hán) durante sira iha liña frente.

“Lamentavelmente, parlamentu aprova ona orsamentu raktifikativu, para finaliza ida ne'e, e la ezekuta, ha'u lamenta tebtebes”, dehan nia.

Deputadu Marcos Xavier hatete, Governu tenke klarifika kestaun liña frente tanba iha fatin balun pesoál sira sempre ejize ba deputadu.

“Ami fila husi suai mai to'o iha mota ulun, ha'u ho deputadu Domingos de Carvalho, Polísia-oan sira hapara tiha ami, sira dehan (deputadu para lai), e ami para tiha (ha'u dehan nusa?, no sira dehan, deputadu ami-nia osan liña frente ne'e to'o agora ami seidauk simu,) ha'u mós moe fali, e ha'u hatete ba deputadu, ha'u dehan hasai US$20 fó ba sira para sosa bee”, dehan nia.

Nu’udar membru Parlamentu Nasionál sente moe boot, ne'e duni husu Governu bainhira mak atu selu servisu liña frente, maibé presiza aselera ho lalais. (*)