Tempotimor (Díli)-Koordenadór Forsa Tarefa ba prevensaun no mitigasaun Surtu Covid-19 iha Timor Leste, Rui Maria de Araújo hatete, sidadaun ne'ebé rekoperadu ona husi Covid-19 bele simu Vasina primeira doze ka segundu Doze.

“Aproveita hato'o ba jornalista no populasaun katak ema ne’ebé detetatu pozitivu, uainhira rekuperadu ona, bele simu vasina doze dahuluk ka doze daruak. Laiha kontra-indikasaun médika. Lo'os duni, iha sertifikadu alta husi izolamentu, hakerek informasaun hanesan tuir mai ne'e “Ema ne'ebé rekuperadu, di'ak-liu hein to'o máximu fulan 6 (neen) sura husi loron alta, mak foin simu vasina”, dehan Rui liuhusi Komunikadu, sesta (23/07).

Informasaun ida ne'e, fo'o sai ho baze ba númeru vasina ne’ebé seidauk sufisiente atu kobre populasaun Timor-Leste. Maibé, tanba iha ona númeru vasina ne’ebé boot, ema hotu ne’ebé rekuperadu husi moras Covid-19, wainhira hakarak simu ona vasina, bele hakbesik ba postu vasina, atu simu vasina.

Aliende ne’e, informa ba públiku katak rezultadu sekuensiasaun genómica husi amostra 300 ne’ebé Laboratoriu Nasionál Saúde (LNS) haruka iha loron 14 fulan-Jullu tinan 2021 ba Peter's Doherti Institute iha Melbourne, Austrália, ho pedidu atu halo teste urjente ba amostra balun, hatudu katak amostra husi ema ni’in-4 ne’ebé tama husi Indonézia iha loron 26 fulan-Juñu ho loron 8 fulan-jullu, iha lineajen B.1.617.2 (Delta), variante ne'ebé preokupante, ka “variant of concern”.

Maibé sira na’in-4 iha hotu fatin kuarentena no izolamentu, 1 negativu ona no fila ona ba uma, na’in-3 sei nafatin sei iha izolamentu. To'o agora seidauk iha evidénsia katak variante ida ne'e, nakda'et ona iha komunidade.

Kazu detetatu foun ne’ebé relata iha loron 23 fulan-jullu tinan 2021: 54 (iha Dili 40, Munisípiu seluk hamutuk 14) feto 25, no mate 29 nune'e kazu rekoperadu hamutuk 45. (*)