Diretór Ezekutivu SAMES Santana Martins hatete, iha fulan tolu nia laran, hahú husi fulan Juñu too Agostu nee, stock ekipamentu ba prevensaun Covid-19 nian iha SAMES sei sufisiente.

"Análiza ne'ebé parte SAMES ninian, liu-liu ekipamentu protesaun pesoál (hanesan) xapeu, roupa, maskara, luvas no mós sapatu sira ne'e, tuir ami-nia analiza katak, stock ne'e sei sufisiénte ba to'o fulan tolu, to'o fulan ne'e, maibé depende ba kazu, kuandu kazu ne'e derepente sa'e, entaun stock ne'e ita labele uza tuir estimasaun ne'ebé iha, tanba ninia utilizasaun ne'e bele aumenta maka'as," dehan Santana iha nia knaar fatin, Kampung Alor, Kuarta (12/08).

Maske kazu Covi-19 la aumenta, Santana husu ba fasilidade saúde sira atu uza ekipamentu prevensaun Covid-19 nian tuir nesesidade.

Tanba, nia dehan, maske TL liu husi kooperasaun ho UNDP sosa ekipamentu saúde, maibé laiha serteza katak ekipamentu refere sei too lalais, tanba nasaun barak mak sei lockdown.

"Esperiénsia hatudu ba ita katak ita iha konfiansa ba UNDP hodi hola sasan ba ita, maibé realidade sasan balun mós sira kompras seidauk hetan, agora ida ne'e la'ós sira mak laiha kapasidade, maibé mundu tomak lockdown, entaun defisíl atu hola," nia dehan.