Tuir informasaun ne’ebé www.tempotimor.com asesu iha pájina MTKI, sesta (03/06) katak, estabelesimentu Sentru Kolposkopia ne'e atu halo tratamentu ba moras serviks nomós liuhusi Sentru ne'e inan no feto sira bele hetan informasaun oinsá bele prevene-an husi moras kankru serviks atubele reduz númeru moras kankru serviks iha Timor-Leste.

Ministra Saúde Odete Bele hatete, ohin marka tan eventu ida ne'ebé mak importante tebtebes nasaun ida-ne'e iha área saúde nian, liliu ba inan feton sira.

Maske dalaruma sei iha problema iha ekipamentu diagnóstiku nian maibé ho tempu ne'ebé mak la'o ho neineik hothotu ninia pasénsia ikus-mai bele haree katak saidá mak hakarak, koko atu kompleta la'ós lalais maibé koko atu kompleta.

“Ohin ita marka tan eventu di'ak ida ba ita tanba ita iha Sentru atubele halo diagnóstiku lalais ba kanru serviks, iha ne'e ha'u hakarak agradese hahú husi Diretór Ezekutivu HNGV, médiku sira liliu ba obstetrisia sira, ba formadór sira, parteira sira ne'ebé mak envolve iha estabelesementu fatin ida-ne'e”, dehan nia.

Ho estabelesimentu fatin ida-ne'e hanoin kedas ba oin katak iha posibilidade bele reduz númeru mortalidade nomós reduz númeru moras iha rai laran.

“Prontu, fatin ida-ne'e ba moras kankru serviks nian, ita hothotu hanoin katak ita sei reduz moras ne'ebé mak liga ho moras serviks liga ho ita feto sira, ba ita-nia feto maluk sira nomós inan sira, ita ko'alia kona-ba sira-nia moris”, hatete nia.

Tanba iha dalan lubuk ida ne'ebé mak uza atu reduz númeru mortalidade ka númeru moras inan nian, primeiru estabelese ona fatin ida-ne'e maibé ho maibé presiza liu mak promosaun saúde.

“Iha dalan ba ita atu lori serbísu ida-ne'e ba to'o iha Óspital Rejionál sira ida-ne'e furak tebtebes tanba ita hakarak dehan atu reduz duni ita-nia númeru mortalidade no morbilidade ba kankru serviks nian ita labele iha de'it HNGV maibé ita koko atu abranje serbísu ida-ne'e ba to'o iha Munisípiu sira liliu Munisípiu sira ne'ebé mak iha Óspital Referal no Rejionál sira”, afirma nia.