Tuir Deolindo, kazu krime no kazu sivíl ne'ebé pendente aas liu mak iha Tribunál Distritál Dili.
"Tribunál Distritál Dili (TDD) ne'e prosesu kriminál pendente ne'e liu 2.000, depois iha kazu sivíl ne'e liu 1.000," dehan nia, iha Palásiu Prezidensiál, Bairru-Pite, Segunda (28/9).
Prezidente ne'e akresenta, kazu kriminál no sivíl iha Baukau no Suai komesa tuun ona.
"Iha Baukau kazu kriminál tuun ona ba 500-resin no kazu sivíl iha 200-resin, alende ne'e iha Suai mós númeru hanesan ho Baukau nian," nia dehan.
Entretetantu, kazu ne'ebé sa'e fali mak iha Oekusi, tanba antes ne'e iha de'it 200-resin kazu kriminál, maibé agora sa'e ba 500-resin no prosesu sivíl mak iha 115 prosesu. Alende ne'e kazu ne'ebé sei pendente iha tribunál rekursu hamutuk tolu.
PTR mós garante, iha tinan 2020 nia rohan sei iha dadus ne'ebé kompletu kona-ba prosesu hira mak finaliza ona.
"Ha'u iha esperansa boot katak, to'o fin-du-anu, ha'u bele hato'o relatóriu ne'ebé konkretu liu, maizumenus hira mak deside ona, hira mak seidauk no problema saida”, dehan nia. (*)