Tempotimor (Dili)-Prezidente Repúblika (PR), Francisco Guterres ‘Lú Olo’, nomea hikas Deolindo do Santos atu kontinua asume kargu hanesan Prezidente Tribunal Rekursu (PTR) ba mandatu tinan haat.
Prezidente Repúblika nomea hikas Deolindo do Santos ne'e, liu husi Dekretu Prezidente Repúblika númeru 23/2021, 28 Abríl.
"Prezidente Repúblika nomea Prezidente Supremu Tribunal de Justisa, entre husi juiz sira, tuir artigu 86 alinea j, atigu 124 númeru 3, husi Konstituisaun Repúblika, konforme artigu 128, ho inerensia, Prezidente Konsellu Superior Majistratura Judisiál", informa gabinete PR ba www tempotimor.com, kuarta (28/04).
Bazeia ba artigu 164, númeru 2 husi Konstituisaun no artigu 110, númeru 1 husi Lei númeru 8/2002, 20 setembru, altera ho Lei númeru 11/2004, 29 dezembru (Estatutu Majistradus Judisiais), ne’ebé estabelese Tribunal Rekursu, enkuantu sai Instánsia Máxima organizasaun judisiária, eziste iha Timor-Leste, ezerse kompeténsia nu'udár Supremu Tribunal de Justisa, to’o ninian funsionamentu.
Tuir artigu 110, númeru 4 husi Estatutu Majistradu Judisial, kompete ba Prezidente Repúblika nomea Prezidente Tribunal Rekursu.
Estatutu Majistradu Judisial hatete, Konsellu Superior Majistratura Judisial prezididu husi Prezidente Tribunal Rekursu.
Tanba ne’e, Prezidente Repúblika, tuir artigu 86 alinea j, artigu 124, númeru 3 no artigu 164, númeru 2 husi Konstituisaun Repúblika, no artigu 29, númeru 1, artigu 110, númeru 1 no 4 husi Lei númeru 8/2002, 20 setembru, altera husi Lei númeru 11/2004, 29 dezembru, dekreta hodi nomea Deolindo dos Santos nu’udar Prezidente Tribunal Rekursu. Dekretu ne’e prodús efeitu hahú husi 29 Abríl 2021.
Nune'e, Serimónia tomada de posse ba Prezidente Tribunal Rekursu sei hala’o iha loron kinta (29/04) tuku 10:30 otl, iha Palásiu Prezidensiál Nicolau Lobato. (*)