"Ha'u hanoin, karik parlamentu simu beibeik surat liliu ba ha'u, ida ne'ebe mak sempre ba hatan hela de'it iha tribunal, se bele sira ne'ebe servisu iha seitor justisa atu haree tok servisu ruma keta ladun di'ak karik, ha'u sente besik ona eleisaun, ha'u nia naran sempre mosu hela de’it, hanesan ema ida ne'ebé tenke ba hatan iha tribunal, maibé depois ba mak ida adia-adia", afirma nia iha plenaria PN, segunda (19/12).
Tanba, dezde tinan 2021 to’o mai agora Parlamentu Nasional hasai ona imunidade ba kalohan nu’udar eis-Ministru MCIA atu ba hatan hanesan suspeitu, maibé tribunal sempre deside adia hela de'it prosesu julgamentu.
"Karik atu halo de'it buat ruma kona-ba ha'u, ha'u mos tenke iha dignidade pelu-menus, ha'u la traidor ba rai ida-ne'e, se halo sala ruma mos ha'u responsabiliza, maibé labele rai odiu ida hanesan ne'e ba ha'u", nia dehan.
Dalaruma tribunal halo hanesan ne'e, tanba besik ona eleisaun, nune'e bolu hela de’it atu ba hatan iha tribunal, maibé ba to'o iha tribunal sempre haruka fila.
"Depois hela fali to'o agora senor prezidente, ida ne'ebe devia ha'u rona ona rezultadu mos adia dala-tolu ona. Ne'ebe ha'u husu de'it orgaun ida-ne'e ninia pozisaun atu bele haree, nune'e mos ohin afeta ba ha'u, maib’e aban bainrua bele ba ema seluk", nia haktuir.
Entretantu kazu ne'e rejista ho númeru NUC 0075/17PGGCC, MP deduz akuzasaun ho husu julgamentu iha intervensaun Tribunál koletivu, tuir artigu 236 no 14 husi kódigu prosesu penál (KPP) hodi notifika arguidu/a na’in-lima (5) ho inisiál ADC, JIB, GPSC nu'udar kargu xefia iha Ministériu Komérsiu Indústria no Ambiente (MCIA), PMCSV nu'udar diretór hosi kompañia privada ida no arguidu Antonio "Kalohan" nu'udar eis-Ministru MCIA.
Tanba, faktu ne'ebé arrola husi Ministériu Publiku (MP) katak, iha tinan 2014, MCIA iha osan atu sosa ekipamentu diversu husi orsamentu kapitál menór ho montante global rihun US$200,000.00.
Hafoin ida-ne'e, MCIA loke konkursu públiku no kompañia Kninuk Star Unipessoal Lda, sai vensedór hodi asina kontratu ho MCIA ho montante global US$191,000.00, ikus mai Tezouru Ministériu Finansa halo pagamentu ho montante refere ba kompañia, maske iha realidade ekipamentu laboratóriu indústria, kompañia foin fornese mai iha MCIA, iha fevereiru tinan 2015, fulan-rua depois halo tiha pagamentu, maibé ekipamentu sira kompañia hatama la kompletu to'o novembru tinan 2015, hodi prejudika ekipamentu sira balun labele funsiona, no la utiliza to'o agora, hodi hamosu prejuizu ba Estadu Timor-Leste ho valor US$143,500.00. (*)
