“Iha 2020 nian ne'e, ami moniroting kazu maizumenus hamutuk 7331 kazu, ne’ebé konstitui husi kazu krime 710 no kazu sivíl iha 23. Ami espera katak, ita-nia, ami fó konfiansa ba Tribunál sira atu kontinua lori justisa ba ita-nia maluk sira atu nune'e sira mós sai ona vítima, maibé labele sai vítima tan iha justisa”, informa Diretóra Ezekutiva JSMP, Ana Paula Maraçal, ba www.tempotimor.com, hafoin halo audiénsia ho Produradór Jerál Repúblika (PJR), iha Kolmera, kuarta (18/08).

Kazu sira ne'e akontese iha territóriu nasionál, tuir ida-idak nia área jurisdisaun hanesan, Tribunál Distritál Dili mak kompostu husi Munisípiu Aileu, Ermera, Likisá ho Dili rasik.

Iha área jurisdisaun Tribunál  Baukau nian mak haree ba Munisípiu Vikeké, Lautein, Manatutu ho Baukau rasik, enkuantu Tribunál Distrital Suai (TDS) mak Munisípiu Manufahi (Same), Ainaru, Maliana, Covalima-Suai rasik, nomós Oekussi nia mesak.

“Entaun, agradese tebes, tanba durante ne'e kazu ne'e la'o, ami espera katak kontinua la'o iha futuru”, dehan nia.

Aleinde ne'e, JSPM mós observa katak, molok iha konfinamentu, Tribunál Movel hala'o ho regularmente, la'ós de'it iha Munisípiu Dili, Suai no Baukau, Oekussi.

“Maibé depois de ita-nia situasaun ida ne'e, julgamentu movel balu tenke pendente, la hanesan bainbain, maibé ami haree katak, julgamentu movel ne'e lori benefísiu boot tebes ba ita-nia maluk sira, ita-nia komunidade sira ne'ebé iha área rurál. Tanba movel ne'e, ita lori justisa ba Tribunál ne'e, ita lori kedas ba sira-nia fatin, tanba ita haree katak iha situasaun, ita haree kondisaun ita-nia povu sira barak mak hela iha área rurál, ne'ebé limitasaun ba transporte, limitasaun ba asesu ba buat hotu, dala-ruma sira atu mai Tribunál mós presiza gasta osan barak, dala-ruma tenke toba iha dalan mak iha edifísiu Tribunál ne'ebé hari'i”, hatete nia.  (*)