“Labele fiar kampaña bosok sira katak dehan vasina ne'e mate, labele fiar sira. Sira ne'e kampaña bosok, ne'e Maromak mak fó la'ós aimoruk mak fó tanba ida ne'e mak ita tenke simu vasina”, dehan Sekretáriu Estadu Kooperativa (SEKoop), Elizário Ferreira, iha Suku Ailelo, kinta (15/10).
Tanba ne'e husu ba komunidade sira tau fiar Governu hakbesik-an hodi simu vasina, no labele tauk atu simu vasina.
"Tanba vasina ne'ebé mak imi simu ne'e kualidade, nasaun barak apoiu ita, tan ida ne'e mak laiha ema ida mak subar husi Covid-19 tanba ne'e mak inan aman sira labele tauk simu vasina”, afirma nia.
Xefe Suku Ailelo, Geraldo Martins, espera husi kampaña vasinasaun ne'e bele loke komunidade sira-nia hanoin atu aumenta vasina tanba dadaun ne'e populasaun 400 mak foin simu vasina.
"Iha ne'e suku ema hamutuk 1400-resin, maibé foin 400-resin mak foin simu vasina nune'e espera liuhusi kampaña vasinasaun ne'e sei aumenta, espera komunidade sira sei bele mai simu vasina”, dehan nia.
Diretór Sentru Saúde Postu Administrativu Hatulia, José Ximenes Martins hatete, suku Ailelo sidadaun ne'ebé simu vasina atinje ona pursentu 20.9 (20.9%)
"Iha suku Ailelo ema ne'ebé simu ona vasina atinje ona pursentu 20,9 (20.9%) siknifika katak barak mak seidauk vasina rihun ida mak seidauk vasina”, afirma nia.
Hafoin Sekretáriu Estadu halo Kampaña vasinasaun iha Suku Ailelo komunidade lubuk ida mak hakbesik-an hodi simu vasina doze dahuluk iha Suku Ailelo, Postu Administrativu Hatulia, Munisípiu Ermera. (*)