Sekretáriu Estadu Peskas (SEP), Elidio de Araújo hatete, dadaun ne'e seidauk tama ba planu asaun anual ba Ministru Agrikultura no Peska tanba ekipa tékniku sira sei estuda hafoin haruka ba Konsellu Administrasaun Fundu Infraestrutura (KAFI).

"Liga ba irrigasaun iha Mehara nian ha’u fó hatene de'it katak, agora ita-nia tékniku halo hela estudu, depois estudu sira sei aprezenta ba KAFI (Konsellu Administrasaun Fundus Infraestrutura) depois haruka ba Ministériu depois para bele halo planu irrigasaun Mehara”, dehan Elidio de Araújo iha Salaun CCL Lospalos Vila hodi hatan ba komunidade sira-nia pergunta iha ámbitu vizita PM Taur Matan Ruak,  sesta (07/01).

Ba atividade hirak ne’e la la'o tanba kauza husi Covid-19 ne'ebé halo impedimentu ba dezenvolvimentu durante tinan rua nia laran.

Maibé irrigasaun iha Postu Administrativu Luru, Munisípiu Lautein liliu Irabere nian dadaun ne'e tama ona iha KAFI, hein nia prosesu kontinuasaun hodi implementa ba projetu irrigasaun refere.

"Hotu tiha ona hodi hein tenderizasaun, ne'ebé mak sei benefisia, ba ita-nia komunidade sira ba área potensiál hamutuk ektare atusualu (800)”, esplika nia.

Haree ba lista irrigasaun ne'ebé tama ona iha konkursu públiku hanesan irrigasaun iha Laivai, maibé husu ba komunidade nia apoiu iha área potensiál ektare atussia (900). (*)