Prezidente ANPM, Florentino Soares Ferreira hatete, lei ne'e sei fó vantajem ba nasaun Timor-Leste, tanba durante ne'e, la halo mineiras ba fatuk sira seluk, maibé halo de'it meneiras bazeia ba diploma ne'ebé preve husi Ministéirial atu haree de'it kona-ba estrasaun matérial konstrusaun nian.

Tanba ne'e, dadaun rikusoin ne'ebé hanesan metaliku iha ona planu atu realiza, maibé sei integra hotu ba lei ne'e rasik.

"Ita nia lei kódigu mineiru nian, ohin ita disemina iha Baukau ita halo abertura, klaru iha Munisípiu sira seluk mós ita halo diseminasaun hanesan, maibé nia abertura hahú iha Baukau", dehan Florentino, kinta (02/12).

Lei ne'e, Prezidente Repúblika promulga loron-180 atu halo diseminasaun ba entidades hotu iha teritóriu nasionál atu regula empreza sira bainhira tama iha Timor-Leste.

Antes ne’e, iha tinan 2017, ANPM halo ona estudu levantamentu jeofíziku uza aviaun hodi leno rekursu sira iha rai okos.

"Estudu sira ne'e, ita atije ona 90 pursentu bele dehan kona 100 pursentu ita halo interpretasaun  potensialidade iha área balun, empreza balun iha liur hein hela bainhira lei ne'e envigor sira hakarak tama mai", dehan nia

ANPM mós halo ona estudu atu haree impaktu ne'ebé forte atu fó risku ba ambiente no sosiadade.

Nune'e, Sekrétariu Jerál Konsellu Veteranu Munisípiu Baukau, Manuel da Costa Soares hatete, lei mineru hanesan lei osan mean, tanba Parlamentu Nasionál liuhusi deputadu sira bele aprova.

"Lei ida ne'e, loke ona espasu ba veteranu atu hanoin oinsa lema ne'ebé dehan, na'in no rin ne'e bele sai realizasaun, tanba bele ona partisipa", katak Manuel

Nune’e, veteranu sira prontu ona atu fó kontibuisaun finansiamentu no rekursu umanu ba produsaun semente iha Kaisidu. (*)