"Nune'e ho haraik-an husu ba VIII Governu konstitusionál ne'ebé lidera husi Sua Exelensia Taur Matan Ruak, atu tau matan netik mai ami hodi halo netik programa liña eletrisidade iha ami-nia suku, atu ami bele asesu, se’lae ami hatete katak kona-ba liña eletrisidade ne'e ami seidauk ukun-an”, dehan xefe Suku Lemea Sorin-balu Leonel ba www.tempotimor.com liuhusi telefone, sesta (05/11).

Maske proposta ba asuntu refere hato'o beibeik ona ba Ministériu kompetete maibé nafatin laiha resposta halo komunidade sira durante ne’e moris nafatin iha nakukun.

"Ami hakilar dala hira ona, Sua exelénsia rasik to’o mai ami-nia suku mós ami hato'o, Ministru Estatal sira mai mós ami hato'o, nain deputadu sira mai vizita no halo sosializasaun mós ami hato'o, maibé to’o agora ami nunka hetan responde ruma husi ami-nia na’in-ulun sira, nune'e ha'u ennome de suku ida ne'e ho haraik-an ba VIII Governu konstitusionál aprova OJE 2022, bele tau netik programa ne'e mai ami-nia suku mós”, hatete nia.

Durante ne'e komunidade sira sosa aki hodi uza no mós balun uza lampiaun, ida ne'e difikulta tebes ba labarik estudante sira atu estuda iha tempu kalan.

Aleinde liña eletrisidade, suku Lemea Sorin-balu iha mós problema kona-ba estrada no bee-moos, iha tempu udan estrada kurva sira ne'e karreta no motorizada liu la di'ak tanba aat hotu.

Nune'e mós iha tempu bailoro Komunidade sira buka bee matan laiha tanba ne'e sira susar asesu ba bee-moos, maibé iha tempu udan sira asesu bee-moos ho di'ak tanba liuhusi programa Nasionál Dezenvolvimentu Suku (PNDS).

Suku Lemea Sorin-balu kompostu husi aldeia Brububou, Leodato ho uma-kain 195, iha populasaun 800-resin. (*)